Ngoloneya gwoshitopolwa shaShana Elia Irimari okwa ti oshitopolwa shaShana osha pumbwa okukonga omukalo tagu hulitha po etembudho lyoshigwana omolwomeya gefundja omumvo kehe.
“Otwa pumbwa okutula mo ongela yokushuna monima, e tatu tula mo yo4x4, opo tu vule okuza mo mefululu ndika twa dhama mulyo,” ta popi ngaaka kombinga yuupyakadhi wefundja.
Ta ti, itaya kala ashike taya galukile pehala mpoka omolwuupyakadhi itau pondolwa, nonando tau vulu okupondolwa.
“Otandi popi nda tala kiipala yookansela ayehe, natu longeni twa itula mo opo uupyakadhi wetembu wu mone ehulilo,’’ ta ti ngaaka. Irimari ndhoka okwa li e dhi popi Etitatu, sho ehangano lyOld mutual kwa li ya yambidhidha iihakanwa yefundja ya tembudhilwa kootenda kEhenye mOshakati.
Omugandji gomauyelele muuministeli wuunamapya omeya niikwamavi Jona Musheko okwa ti, uuministeli owa longekidha oomilliona N$98, ndhoka tadhi ka topolelwa iitopolwa ya yooloka yokonooli okupungula omeya opo ga kale haga longithwa monakuyiwa.
“Oshitopolwa shaShana otashi ka pewa oomilliona N$15, ndhoka tadhi ka longithwa okupungula omeya,’’ ta fatulula ngaaka.
Musheko okwa ti, oshitopolwa shaShana osha tameka nale okwiithana ookontalaka dhi ninge omayindilo opo ku tamekwe okulongwa omatale ngoka.
Omagumbo ga thika 48, ngoka ga li ga tembudhwa mOshitopolwa shaShana okwa li ga pewa iikulya, mwa kwatelwa uusila, omagandhi gokulya, oondooha dhoohi, oosopa, iikwamagadhi noothewa.
Natango oya pewa ootenka dhomeya dhi li ntano oshowo oomiti dhokuopaleka omeya ga kaka. Ayihe okwa li ya kotha ongushu yoshimaliwa N$45 000.
Ngoka kwa li a kalelepo ehangano lyOld Mutual, Mignon du Preez, okwa ti oya li ya yambidhidha ngaaka oshoka oya itaala mokugandja moshigwana, ngaashi naanaa oshigwana hashi ya yambidhidha.
“Elalakano okukwathela mboka ya adhika ombaadhilila kuupyakadhi womeya gefundja, nayamwe oya kanitha oonzo dhiiyemo yawo, onkene oshidhigu kuyo okugwanitha po oompumbwe dhakehesiku,’’ ta ti ngaaka. Okwa totha mo kutya natango oya yambidhidha wo oshitopolwa shaHangwena shoka shi na aantu ya yelulwa komeya gefundja niinima ya faathana naambyoka ya gandja mOshana, natango yongushu N$45 000. vkaapanda@nepc.com.na