Elelo lodoolopa yaShakati nongeshefa yoRany Group oya yandja oikwafifo yombuto yoCovid-19 koshipngelo shaShakatati Etitano.
Oikwa ei oya yandjwa nelalakano opo ikwafele oshipangelo shaShakati eshi kwali shili momhumbwe yoilongifo pefimbo eli loCovid-19 tai dana onghandangala moshilongo.
Oilongifo ei ya yandjwa omanyala,
oulapi vokomilungu, oushina vokukonakona oupyu womunhu, oikutu yokudjalwa kovanailonga vopaundjolowele opo a kele va amenwa kombuto ei moipangelo ngeenge tava pange ovanaudu veli kepango lombuto
ei.
Moshipopiwa shaye ngoloneya waShana Elia Irimari okwa popya ta ti okwa pandula unene elelelo lodoolopa yaShakati oshoyo nongeshefa yoRany Group eshi ina oshisho lovanailonga vouhaku notava kwashipaleke kutya oshipangelo shaShakati oshina oikwafifo ya wana yoku amena ovanailonga a veshe moshipangelo.
Irimali okwa ti osha li Etivali efimbo longula eshi omukulunhuwiliki woshipangelo shaShakati e ya kombelewa yaye takeme omhumbwe yoikwafifo ina i wana koshipangelo, onghee okwe mulombwela opo a shange omukanda ye a shive eupe ovanangeshefa moshitukulwa shaShana neelelo lodoolapa yaShakati.
“Eshi nda pewa omukanda onde u tumina keenhele dayooloka. Ongeshefa yoRany Group oyo imwe kwa li yanyamukula tete, ndele tai yambidida noshimaliwa shi fike N$62 000,” Irimari ta ti.
Oilongifo ei oili pongushu yoshimaliwa N$72 000, omo N$10 000 okwa dja kelelo laShakati omanga ongeshefa yoRany Group oya dja N$62 000 opo va lande oikwafifo ei.
Oilongifo ei okwali ya tambulwa ko komukulunhu woshipangelo shaShakati Dr Asumani Kibandwa ou a popya ta ti okwa pandula unene eshi mopaife oshipangelo sha mona oikwafifo yo kukwafela ovanailonga vopauhaku.
“Ohandi indile natango opo oshiwana shi yambidide oshipangelo shetu shaashi natango otwa pumbwa oilongifo ihapu unene tuu pefimbo eli omwaalu wau ka pombada wovanhu a va tava kwatwa omukifi ou, otau ende wauka pombada efiku nefiku. Onghee oshiwana osha manguluka okukala sha yambidida oshipangelo,” Dr Kibandwa ta ti.
Dr Kibandwa okwa denga omufindo ta ti ovanhu nava ye va katunhilwe ombuto yoCovid-19 shaashi omufiki ou owa nyika oshiponga neenghono. Yee tayelifa ta ti Etitano loshivike sha djako omwaalu u fike 60 povanhu vakwatwa koCovid-19 ova tambulilwa moshipangelo shaShakati.
Elelo lodoolopa yaShakati nongeshefa yoRany Group oya ti otai twikile nokukala tai shakeneke epangelo ondjilakati nelalakano lokulwifa ombuto ei yoCovid-19.