Omunangeshefa gwomonooli Sindano Hango, ngoka a li a monika ondjo moshipotha shekwatokoonkondo nokwali kwa tegelelwa a pewe egeelo lyondholongo ohela, egeelo lye olya undulilwa komasiku 28 Juni nuumvo.
Hango okwa li a holoka komeho gwomupanguli Leopoldt Hangalo, mompangulilo yopevi yaShakati.
Hango okwa li a tula mo eindilo opo oshipotha she shokumonika ondjo mekwatonkonga shi talululwe kOmpangu Yopombanda (High Court).
Omweeti gwiihokolola a kalelapo ompangu okwa li a kondjitha kutya Hango na pewe egeelo lye esiku ndyoka, omanga a tegelela eyamukulo okuza kompangu yopombanda.
Omupanguli Hangalo okwa li a pula ompangu kutya oku li ngaa ponkatu ombwaanawa okupangula nokutokolela Hango egeelo lye, omanga pwa kala omapopyo kutya okwa futwa, nokwa li dha ningwa opo kaa pangule Hango?
“Oonyala dhandje odha mangwa onkene itandi vulu okutokola egeelo nena, omanga pe na oshipotha shetalululo lyoshipotha inaashi pwa. Otatu tegelele ompangu yi gandje eyamukulo lyahugunina opo ndi tsikile noshipotha shika,”Hangalo a popi ngaaka.
Ta gwepo ta ti, Hango oku li kondje sho a
li e mu pe i ifutilemo nombooloha yoN$10 000, sigo esiku lyegeelo lye tali thiki. Otaku hokololwa Hango ngoka anuwa a li a kwata koonkondo omumwayinagona nokukambadhala oku mu futa andola e mu mweneka niimaliwa N$10 000, muKotomba 2014.
Hango momishangwa ndhoka a gandja kOmpangu ya shiga ko moshilongo (Supreme Court) okwa ti, ompangu yopombanda (High Court) mOshakati oya ningi epuko sho inaayi itaala uumbangi we kutya okwa yile momilalo nomukiintu ngoka papitikilo, nokwa monika ondjo kohi yokatendo hoka ke li ompinge nomahepeko gomomagumbo komomumvo 2000.
Esiku ndyoka pondje yompangu Hango okwa popi kaatolinkundana kutya nonando omahokololo ngoka ga kala taga shangwa miifokundaneki, kapu na ngoka ha pula ehokololo lye, opo a vule okupopya ombinga ye.
“Aatolinkundana otaya shanga ombinga yimwe omanga nangame ndi na ehalo lyokupopya oshili shandje,” ta ti ngaaka.