OUTAPI- Omupedu Presidende wongudu yoSwapo Netumbo Nandi Ndaitwah okwa ti oukwamuhoko otau teya po Namibia molwashi oshiwana ka shina oukumwe ngaashi kwa li nale.
“Xulife po onghalo yokakombo noludi shaashi itashi tu twala komesho. Atushe Ovanamibia ve fike pamwe,” ta ti.
Nandi Ndaitwah okwa
popya e li kwatela komipopyo ta dilile moshiwana kutya ovanhu moshitukulwa shaMusati nOhangwena ka vena ombili nelongelokumwe.
Edi okwe popya moshipopiwa shaye pefimbo loshikonga shoSwapo kOutapi Olomakaya pefimbo kwa li ta popi novakwaSwapo.
Okwa kumaida Ovanamibia opo va kale ve na oukumwe nelongelo kumwe opo va okuhambula po oshilongo.
Okwa ti ovayambididi voSwapo na xulife po okupukifwa kovanhu veengudu domilameno shaashi ota va teye po Swapo.
“Ohandi ka kufa ombinga momahoolo ouPresidende momudo 2024 onghee onda pumbwa eyambidido leni opo ndi dule okufindana,” ta ti.
Okwa ti okwe li longekida okukala a ninga omupresidende momudo 2025 ngaashi naana a hoololwa koshiwana a ninge omupedu presidende woSwapo.
Onghee okwa kumaida oshiwana opo longe noudinini okuxwaxwameka Ovanamibia va yambidide Swapo.
Lopokati opo, Nandi-Ndaitwah okwa popya yoo vali kombinga yomahokololo oipupu kutya kave na ombili nomuprimaminista Saara Kuugongelwa Amadhila noshoyo minista Pohamba Shifeta.
“Ame ondina ombili navo. Otuna oukumwe muwa onghee kandili omhinge navo shaashi kwa li tuli momafiyafano omahoololo oupedu Presidende woSwapo,”a yelifa.
Okwa yelifa yoo vali ta ti ke li omhinge novanhu ovo ina ve mu hoolola pefimbo kwa li tava ningi oshikonga omudo kwa dja ko.
Omukwatakanifi woSwapo moshitukulwa shaMusati Sacky Kayone, okwa ti mOmusati ove li longekida okuyambidida omuulikwa presidende wavo momudo 2024.
Lopokati hamushangandjai woSwapo Sophia Shaningwa okwa ti Nandi-Ndeitwah oye ashike omunhu e li mondjila ta dulu okuninga omupresidende womahoolo omo 2024.
-fhamalwa@nepc.com.na