Ovakwapata vomulumenhu weedula 59, a li e na oudu wopamadilaalo ova holola enyeme lavo molwaashi vati a dipawa kovapolifi, efyo loipundjamenye.
Otaku hokololwa Negumbo Embashu a dipaelwa meumbo laye li li momukunda Ehafo lyaKandenge moshikandjohoololo Uuvudhiya moshitukulwa shaShana ongula yEtitano.
Omufiyekadi waye, Hendrina Embashu okwa hokolola ta ti omushamane waye okwa dipawa momesho avo nokaana kavo konghelo.
“Negumbo okwa li ashike e kwete okati kanhini kodimbo e li ofika. Ina nyamukula ovapolifi eshi kwa li tava popi naye. Ova dipaa omushamane wange ehe na eshi a ninga,” ta hokolola.
Okwa hokolola ta ti efiku olo ova pula ekwafo kumushiinda shavo opo a dengele opolifi i va kwafe i ka twalwe Negumbo koshipangelo eshi va dimbulula kutya oudu waye owa tukuka.
Ta ti omusamane waye ka li a nyika ouxwapindi, ashike ngee omiti daye oda pu po oudu ohau tukuluka, naashi ohashi mu etele oumbada, unene eshi meumbo va li mo ashike vatatu efiku olo.
“Ovapolifi eshi ve ya, ova li tava popi naye opo ngeno a kupuleshi oshiti osho a li e na peke. Ohaluka umwe womuvo okwa umba ondjebo oikando ivali nokuyasha omushamane wange mokuulu,” Embashu ta ti.
Ta ti okudja opo omupolifi umwe okwe mu tuma opo a ka tale ekumbafa monduda.
“Eshi nda eta ekumbafa ove mu tonyena mo noku mu tumbila motuwa ve mu twale kokapangelo,” ta ti.
Embashu ta ti opo ve li po, ovapolifi ova aluka tava hokolola kutya Negumbo okwa xulifila mondjila, koshipangelo ina fika ko.
“Meumbo otwa hangika mo ashike nonghelo yetu yeedula 21. Ova dipaa omusamane wange ehe na eshi a ninga,” ta popi noluhodi.
Omupedu Commissioner wopolifi moshitukulwa shaShana Nico Steenkamp okwa hokolola ta ti Negumbo okwa li e kwete oshiti a hala okudenga ovapolifi pefimbo va ifanwa keumbo laye kovaneumbo shaashi oudu waye wa tukuka.
Ovapolifi vati okwa li tava popi naye kutya natule po oshiti pefimbo umwe womuvo a umba noku mu yasha komaulu.
Steenkamp ta hokolola ta ti Negumbo okwa xulifila mondjila pefimbo kwa li ta twalwa kovapolifi kokapangelo kOnaanda.
Ta ti fiyo opapa kape na omufekelwa a kwatwa po onghee omakonakono opolifi otaa twikile.
Ndinosia Embashu, okandenge kaNegumbo okwa pula opo ovapolifi ovo va dipaa mumwaina va kwatwe po diva, vo va twalwe komhangu.
“Ovapolifi nava kwatwe po ashike. Kashi li payuuki va twikile noilonga yavo omanga va dipaa omunhu wetu. Omunhu ngeenge okwa dipaa na kwatwe po ngaashi naanaa hashi ningilwa aveshe ovo va dipaa,” ta ti.
Otaku hokololwa Negumbo a li omupolifi poshitaashi shopolifi mOshakati fiyo omomudo 2016 omo a dja moilonga eshi a hakukilwa koudu oo wopamadiladilo. –fhamalwa@nepc.com.na