Omukulupe e na eedula 102, oo ta tekula ounona 14, okwa pewa omakwafo oikulya, oikutu, oikumbafa, opomba yomeva, nokwa tungilwa yoookandjuwo konima eshi kwa li ta pula moshiwana opo shi mu yambidide.
Elelo lodoolopa yaNiipa ola pa meekulu Hileni Martin opomba yomeva nokandjuu omanga ombelewa yakansela yopashikandjohoololo oya ndja oikulya, sho oshiwana osha yambidida omukulupe noikutu, oikumbafa, noikulya.
Konima yoifike ivali Kundana okwa li a talela po eumbo lomukulupe ou lili momukunda Oshakondwa moshitukulwa shaShikoto, oo kwa li ta hokolola e na ovatekulu veli 14 meumbo laye hava xupu mokamaliwa kaye kopendjele.
Efiku olo omukulupe okwa hokolola ta ti ota pula ekwafo moshiwana opo shi mu yambidide noikulya, oikumbafa, oikutu yovatekulu vaye, okwa li a pula yoo vali a pewe ekwafo lokapomba komeva ka tulwe meumbo laye shaashi ohava teke kokule.
Okwa kala nokukwandjangela ta hokolola ta ti okuli moudjuu unene eshi e na ovatekulu vaye veli 14 meumbo, ashike kave na oikulya ya wana, ye ta ti nonande oha kwata oshimaliwa shopendjela kepangelo keshe omwedi, ina shi wana okulanda oipumbiwa yomeumbo.
Konima eshi Kundana a shanga ehokololo lomukulupe moshifo kundaneki, oshiwana oshe lilesha nokukala tashi ningi eenghendambala dokukwafela omukulupe. Onghee konima eshi oshiwana sha lesha ehokololo lomukulupe, vahapu ova kala vena olukeno nehalo lokukwafela omukulupe.
Mopaife ngaha eumbo lomukulupe ola yambidindwa noipumbiwa aishe ei kwa li ta pula moshiwana shi mu yambidide.
Pefimbo elelo lodoolopa ya talela po eumbo lomukulupe omupedu mayola modoolopa yaNiipa Hilen Idhogela okwa popya ti ovanyasha aveshe ava vena ondodo onhi10 nonhi 12 otava ka pewa oilonga melelo lodoolopa yaNiipa ketameko lomwedi Anguste.
“Ohatu ka yandja oilonga kovashala ava vena ondodo onhi10 nonhi12 opo va kale tava mono oshimaliwa, vo va dule oku shakeneka omukulupe ondjilakati ngeenge tashi ya peemhumbwe domeumbo. Onghee onda hala oshimaliwa shondjambi yeni shi kale tashi longifwa pamukalo muwa, nokukwashipaleka kutya ota mukwafa yoo vakweni ava hava i kofikola,” Idhogela ta ti.
Omukulupe pamwe novatekulu vaye okwa li va tambula ko omakwafo nolupandu linene.