OSHAKATI – Ovanafikola va dja keefikola da yooloka mwa kwatelwa ovalihongi va dja koiputudilo ova pewa ehongo nouyelele kombinga yefimano lokuyandja ohonde.
Ovanafikola okwa li va ngudumana kosekundofikola Iipumbu Secondary School mOshakati oshivike sha dja ko.
Omupopiliko wehangano loNamibia Blood Transfusion Service (NAMBTS) Titus Shivute okwa ti elalakano loshikonga eshi okuyandja ehongo kovanafikola opo va kale ve na eudeko la wana kombinga nghene sha fimana okuyandja ohonde.
Onghee okwa ti osha fimana opo ovanafikola navo va kufe ombinga mokuyandja ohonde molwashi ohonde oya fimana kovanaudu ve li moipangelo.
Okwa weda po ta ti ohonde tai yandjwa ohai kwafele ovanhu ve li momhumbwe yohonde moipangelo ngaashi omunhu e na okaangela, omunhu ta tandwa ile meme ngeenge ta pulumuna. “Omudo keshe ohatu yandje ehongo kovanafikola koitukulwa ya yooloka. Omunafikola ngeenge okwa kala e na eudeko lefimano lohonde ota dulu yoo vali oku ka topolelafana ouyelele komikunda wavo noshoyo kovakwapata vaye,” ta ti.
Onghee okwa ti oshikonga shokuyandja ohonde meefikola dokonooli otashi ende nawa molwaashi ovanafikola otava holoka momwaalu muhapu.
Okwa yelifa ta ti ovanafikola ve na eedula 16 -17 otava kalelwa po kovakulunhu vavo pefimbo tava ka yandja ohonde shaashi inava fika ve likalela po vene, omanga ovanafikola ve na eedula 18 okuuka pombada otava dulu okukala va yandja ohonde pehe na omukalelipo shaashi eedula davo oda wana okulikalela po.
“Oshikonga eshi otashi ka ningwa koitukulwa ya yooloka moshilongo, omo eefikola tadi ka talelwapo kovanailonga vehangano lokuyandja ohonde opo vanafikola va pewa ehongo lokuyandja ohonde,” ta ti.
Okwa kumaida oshiwana opo shi twikile okuholoka momwaalu muhapu okukayandja ohonde shaashi ohonde ohai xupifa eemwenyo davanhu. –fhamalwa@nepc.com.na