Elelo lodoolopa yawakopmund ola yandja omakwafo kovakalimo ava ve na eebashu davo dapya po komundilo. Ovo va kwafelwa ovakalimo vokolukanda loDRC li li moSwakop, ovo omafiku enya vali veli hanga pomutenya omolwa omundilo. Omakwafo oo a yandjwa okwa kwatela mo oikulya, omatalashe, eetenda doku nangala, eembiya dokutelekela, oikumbafa noikutu youtalala. Meenghundafana a ninga a ninga naKundana omunambelewawiliki wa muni Archie Benjameni okwa hokolola ta ti ombelewa yavo oina oshisho noshiwana efimbo keshe notai kwashipaleke kutya oshiwana osha pewa omakwafo ngeenge shili momhumbwe. Etitano loshivike sha dja efimbo lomutenya kolukanda loDRC ovakalimo ova shaala pomuyenya eshi eebashu davo dili 16, da yaka omundilo. Okwa kolekwa kutya meebashu omo omwapila omaliko ovakwashiwana. Elao linene moshiponga eshi shomundilo ina mu kanena nande omwenyo, ashike omwa monena oshiponga okaana kena eedula mbali aka ta ku hokololwa kutya okapya keenyala. Otaku hokololwa kutya okaana oko okeli monghaloiwa paife. Okwa didilikwa eedoolopa daWalvis Bay naSwakopmund odo dimwe nda ninga oihakanwa yomundilo unene shaashi meedoolopa edi mbali ohamu pi unene eebashu lwoikando ihapu.
Benjameni okwa hokolola ta ti mopaife ngaha ovakalimo ova pewa onhele a pa tava kala tava di pena eameno lawana, nomeva.
“Ovakalimo aveshe otwe va pa eetenda dawana noikumbafa shaashi okuna paife outalala. Onghee ombelewa yetu otai twikile nokukala tai yandje omakwafo koshiwana una shili moupyakadi,” Benjameni ta ti. Okwa ti oshiwana osha tambulwako opo shi yambidide ovakalimo ava va dengwa pomutima komundilo eshi eebashu davo da pya po, onghee keshe umwe ou tadulu na kwafela nakashona e na po. “Omilandu doCovid-19 otadi wanifwa po efimbo keshe kovanhu, no hatu kwashipaleke kutya keshe omunhu ote li ufa komalombwelo aa a tulwa po oCovid-19,” Benjamen ta ti.