Natalia Sheelongo weedula 39, e li omukalimo womOmuthiya ota indile moshiwana opo shi yambidide ounona vaye va dalwa elongo noikwafifio ngaashi omilambo, omashini, noshotu tuu.
Sheelongo okwa mona ounona velongo voumati vavali nokadona kamwe muApril.
Pefimbo a ninga eenghundafana naKundana Etitano okwa ti oku li a telela eshongo linene lokukala ta landele ounona omashini, omilambo noshoyo oidjalomwa.
“Ka shipu okukala u na ounona velongo shaashi keshe efiku ouna okulongifa oshimaliwa shihapu to landele ounona oipumbiwa eshi paife oinima ya ninga ondilo,” Sheelongo ta ti.
Okwa hokolola ta ti nonande e na oilonga hai mu pe oyuuyemo oku li natango ta dengwa konghalo yokutonatela ounona vaye shaashi oyuuyemo yaye ina i wana.
Sheelongo okwa ti momudo 2018 okwa monene ounona veehamba onghee paife oku li e na ounona vatano kumwe.
“Ohandi pandula kalunga eshi a pange ounona vatato moikango ivali. Nonande nda talela omashongo a yooloka eshi itashi ku fange omukumo wokutekula ounona vange shaashi ounona omaano a dja kukalunga,” ta hokolola.
Okwa weda po ta ti ekwafo keshe ola tambulwa ko onghee ku keshe ou e na ehalo nakwatafane naye konomola yongodi yaye 0812279338.
Okwa kunghilila ovakainhu vakwao navo ve li moupyakadi wokutekula ounona vavo opo va kale tava ka konga omakwafo moshiwana ponhele yokulongela ounona ominyone.