Mbunga zovarugani vanakutumbura asi Trade Union Congress of Namibia(Tucna) kuna kugava usima ndi umbondo kwaministera goyirugana Utoni Nujoma asi eninkiliromo konyima tupu mbunga zovarugani zonene zavakarerapo ngovarugani kavazisigireko mokutarurura asi ngapi navawapukurura nonzambi dawo.
Mokukwama nye kwedi age Presidente gwaTucna, Paulus Hango, ngendeseso ezi kwazirugana awo vahana kudivako Yuma kapi hena vavapukurura mokugwedako, Tucna ntani omu valipakerera kwazuvha tupu konombudi asi komitiye vana zitulisapo.
Hango katenterere vanambudi asi age kwayizuvha tupu asi Nujoma ana turapo komitiye ntani mozo komitiye kuna karamu murugani gumwe tupu ogu ana kara asi gombunga zaNAPWU.
Kutara nsambi zovarugani sirongo nasinye kuna kara sininke sosidigu unene, ntani kuna gumu varugani wovanzi sili unene muntu gumwe tupu kapi tavhuru kukarerapo eyi vana hara varugani navenye womoNamibia yimo ana kutanta ngos Hango. Age katente asi kapi yina wapa mokusigako Tucna melikwamo lyangesi, unene mokutulisapo komitiyee.
Age simpe kagwedereko asi mokutura nye m,untu gumwe tupu akarerepo udigu wovarugani, hawe oyo kwakumoneka ngwendi ose vanatusigiko.
Varuganai kuna kumoneka ngwendi asi kugwana yoyinzi kupitakana eyi vaturapo mosirongo setu Namibia. ‘’ Ose kapi ngatuyitanmbura yitundwamo oyo, ngavakagwana morwa kuna kara asi kapi ngayiwapukurura eparu lyovantu ,’’ yimo ana kutanta ngoso Hango nkera.
Hango simpe katente asi aturo komitiye ezi kwaministera kuna kuyimona awo asi kapi vana kwama veta zakarapo zovarugani omu sintokorwa 107 zoveta zovarugani veta Act 11 zomo 2007, kuna kutanta asi nombunga dovarugani ngadi tambura muntu ogu ngakakarerapo uwa wovarugani.
Nsene ministeli nazitwikira ngorooro nenkiliromo, Tucna nagusa nye ngendeseso nazo peke omu natara asi varugani vahavaninkiliramo.
Nampili ngomu asi moNamibia kwakaramo upolitika wamanguruka, vantu vetu simpe kuna kara neninkiliromo lyopaekonomi, eyi kuna kumoneka nawa nawa kukwama nye omu yina kara epiro yirugana ntani malisigo paekonomi, ‘’ yimo ana kutanta ngoso Hango.
Hango katente asi uwa ou tuna kara nawo vana kugwana varugani nayidipaga mukaro govantu ‘ ntani kuna kumoneka asi tayikatwikira momunene.
Tucna kuna kara asi kapi bnakatarerera asi varugani vakanyanderemo kowo vana hara kuligawopeka pwavene. Nujoma kapi katumugwene nkera alimburureko.
- mndjevera@nepc.com.na