Omunyasha weedula 25 okwe likufa omwenyo shaashi vati a lombwelwa komukainhu waye kutya ine mu hala vali.

Oshiningwanima osha ningwa mexuliloshivike komukunda Efinde moshitukulwa shaHangwena.

Nakufya okwa tongololwa oye Shapwa Benjamin Penelaka omukulimo womomukunda Efinde moshikandjohoolo shaShikunde.

Omukulunhu koshikondo shokukonakona oimbuluma mopolifi mOhangwena, omupedukomufala Zachariah Amakali okwa hokolola ta ti Penelaka okwa li tava tanguna nomukainhu waye efimbo lokonguloshi.

Vati ongula eshi kwa sha Penelaka okwa kufa ondjebo yaye nokulombwela ovaneumbo kutya otaka yasha eenghuti.

Okudja opo ovashiinda ova uda ondjebo ya topa nokonima eshi va ya ponhele opo ova hanga Penelaka e li moixwa a xulifa.

Oshiningwanima shikwao, omukulupe weedula 79 naye vati okwe lidipaa nondjebo mexuliloshivike momukunda Owalyainda-Eemo moshitukulwa shaHangwena.

Nakufya okwa tongolwa oye Ananias Wapunduka. Opolifi oya hokolola tai ti omukulupe ina fiya po omukanda tau yandje ouyelele kombinga yefyo laye.

Omakonakono opolifi otaa twikile moikumungu aishe yomalidipao.

Eshi a kwatafana naKundana, omuxungimwenyo moshipangelo shaShakati Victoria Hauwanga okwa  ti ovalumenhu kave hole okukakonga omakwafo koipangelo kovaxungimwenyo ngeenge ve na omaupyakadi unene tuu momakwatafono opaihole. Onghee okwa ti naashi ohashi eta opo ovalumenhu vahapu va ninge oihakanwa yokulimangeleka noshoyo okudenga nokudipaa ovakainhu vavo. Okwa kumaida ovalumenhu opo va kale tava ka konga omakwafo exungomwenyo kovaxungimwenyo ile kovafitaongalo. Hauwanga okwa ti osha fimana ngeenge ovanhu tava pewa exungomwenyo opo ku kelelwe ovanhu vehe lidipae noshoyo okukelela omahepeko omomaumbo.

 “Omunhu ngeenge a pewa exungomwenyo oha kwatwa komhepo ipe. Onghee oshiwana nashi manguluke okulopotela ovaxungimwenyo ngeenge tashi hepekwa koupyakadi wopamadilaadilo. Onghee okwa ti okulikufa omwenyo kaku shi ekandulepo lomukundu ashike eshi sha fimana okukonga ekwafo.

Caption: Ve lidipaa… Ovalumenhu vavali ve lidipaa noifufuta.