KATIMA MULILO – Mungendenge wakubala batu hautateka kachenu, sikiliti sa Zambezi si itukiselize kubona kuli batu kaufela babaliwa. Babeleki bababala batu baka kala kupotela mandu, minzi ni mahae kacenu kubala batu ni mandu hala sipala sa unumwaha. Mwangambolo ni New Era sibuabui wasipalo sa 2023 mwasikiliti sa Zambezi Damien Siambango, natolokile kuli sikiliti si itukiselize kubona kuli batu kaufela babafumaneha mwasikiliti sa Zambezi babaliwa.
Siambango natolokile kuli litukiso kaufela liezizwe mi batu kaufela bababala batu base bainzi kale mwalilalanda kaufela za sikiliti zelobapeli. Kukala kwa silalo sa Cheeto mwasilalanda sa Kongola mane kuyoli Impalila mwasilalanda sa Kabbe ya
Mbowela.
Naekelize kuli kunga mukoloko wamandu ni mahae hamoho cwalo ni baeteleli bamabasi mwamandu neku ezahalile viki yefelile, mi kachenu kubala batu kaufela ni mandu kukatateka. Hala litukiso zeñwi naize viki yefelile nebapotezi kamaiso yasipokola mwasikiliti kuyo kupa tuso yabona kuli bababala batu bafumana silelezo, sihulu haiba inge babala batu mwanako yabusihu.
Naekelize kuli nebafumani sepiso yakuli mapokola bakana bakulisa mwalibaka mokufumaneha hahulu bubangoki nako ya manzibuana. “Busihu bwa la 24 Muimunene kibwa butokwa, batu baswanela kuhupula kuli neba pumuzi kai, mi batu bane bali mwandu kibaba kai. Batu kaufela mwa sikiliti sa Zambezi bakupiwa kuba ni swalisano kuli zeka fumaniwa likone kutusa muuso mwakulelela sicaba,” nekubulezi Siambango.
Naekelize kuli sikiliti sa Zambezi nesifumani limotikala ze 147 zakusebelisa mwamungendenge wasipalo, mi babanca babasabeleki babalikana 418 neba kenyizwe musebezi wakubala batu.