Omupresidente Netumbo Ndandi-Ndaitwah okwa ti ovanyasha 600 ve li koNational Youth Service (NYS) tava kufa ombinga komandiki omadeulo ovanyasha ngaashi Rietfontein noHenties Bay otava ka kutwa metanga leameno.
Okwa ti omanga ovanyasha 430 tava ka tumwa kouministeli woikwameni, omataulukilo okeengaba neameno.
Edi Nandi-Ndaitwah okwe di popya Etitano, pefimbo kwa li ta patulula pambelewa oilonga yomadeulo ovanyasha kendiki Rietfontein olo hali deula ovanyasha.
Ovanyasha 1 030 ova mona omhito yokukutwa komadeulo komandiki ovanyasha ngaashi Rientfontein osho yo koHenties Bay koshitukulwa Erongo.
Omudo keshe ovanyasha okudja koitukulwa aishe ohava ningi omaindilo okuya komadeulo koNational Youth Service nelalakano lokupewa ounongo womaifano a yooloka mwa kwatelwa ounamapya.
Omupresidente okwa ti okutameka omudo 2026, omahangano epangelo a yooloka naa kale taa yandje eemhito doilonga kovanyasha tava di komandiki omadeulo a shivika nawa National Youth Service (NYS).
Okwa weda ta ti omahango epangelo naa kale natango a tula po omutengenekwafaneko woshimaliwa shokufuta ovanyasha ovo tava kutwa opo va mone ounongo.
“Epangelo otali lalakanene okuyandja eemhito doilonga kovanyasha tava di ko-NYS opo va dule okumona ounongo kombinga yomaifano oo ve lihongela komadeulo. Ashike novanyasha tava di koiputudilo ya yooloka navo otava ka pewa eemhito doilonga,” ta ti. Nandi-Ndaitwah okwa yelifa ta ti ovanyasha ngeenge va mona oilonga nena otashi kwafele okukandula po omukundu womwaalu muhapu wovanyasha ve li momapandaanda vehe na oilonga.
Okwa twa ovanyasha omukumo opo va twikile okulonga nondjungu osho yo okulitula mo momadeulo avo.
Minista wehongo, omaungoba, omaudano novanyasha, Sanet Steenkamp okwa pandula endiki loNational Youth Service eshi tali longo nelitulemo okuyandja omadeulo kovanyasha.
“Komadeulo komandiki aa ohaku di ovanyasha va deukika lela nove na ounongo wa wana,” ta ti.
Okwa ti omandiki oludi e li okwa fimana shaashi otaa kwafele okukandula po omukundu wovanyasha ve li momapandaanda. –fhamalwa@nepc.com.na