Pula itibisa masimu aba Nankuntwe

Pula itibisa masimu aba Nankuntwe

NANKUNTWE – Litabula haibile tiululo kwa buñata bwa balimi mwa sikiliti sa Zambezi, nelitisize singanyenganye kwa balimi kwa silalo sa Nankuntwe, teñi masimu abona natibisizwe ki mezi apula. Bakeñisa kuli buñata bwa bona balima litapa pula yene inelile hahulu mwa liviki zepeli zefelile nesiile mbonyi ya bona imbwambwami mwa mezi. 

Yomuñwi wa balimi bane basinyelizwe hahulu ki Lumba Kabuku yana sakoni kutoloka hande butuna bwa sinyehelo yahae. Kabuku natalusize kuli neba kalile kulima masimu abona mwa kweli ya Yenda, kono neba sinyelizwe ki likubu. 

“Sina hamubona kuli simu ye imwa lukwakwa, halukala kucala mwa kweli ya Yenda likubu neli lusinyelize hañatañata. Nelinze lica mwa masimu aluna, hape lwa cala sinca, nelusa zwafi. Kono sinyehelo yetuna netile busihu bwa Lasabata la 18 Sope, pula haito nela busihu kaufela haisi kupazulisa lizazi. Kona fone tibezi simu yaluna. Pula yeo isali kunela ona fo, nesika nela hape,” nekubulezi Kabuku.

Azwelapili kutalusa kuli bamano bona kuli pula nesika kutela kunela hape sebaba ni muhupulo wakuli bayepe mungelo kuli bakone kuzwisa mezi mwa simu kuisa mwa mulapo oli bukaufi. “Nelufumani bashimani baketalizoho mi sebato kala kuyepa mungelo. Kono nekubonahala kuli kone bayepa nekulumbile mi mezi nasabubi kuzwa mwa simu kona fone kupalezi,” nekubulezi Kabuku.

Azwelapili kutalusa kuli seba bona kuli mwendi bakupe tuso kwa mubuso kuli mbonyi yabona isike ya sinyeha kakuli kona hane ikala kupakata. “Nelu lizelize bakatengo kasikiliti seba lubulelela kuli lushimbe maswaniso ni kubalumela. Nelu ezize cwalo kono hakuna kalabo yene lufumani. Nebasika taha nihaike kutaha kapa kulubuza kuli bakona kulutusa cwani, neba amuhezi feela maswaniso ni kuitulela,” natalusize.

Yana limile mwa simu yeswana Ntwala Bulongo ni yena nahatelezi kuli ku utwisa pilu butuku kuli neba lekile peu, ne ba ikatalize kucala kono neba tilo sinyezwa ki pula. “Ni utwa pilu butuku kakuli mone lucalela simu ye nekuli tata, kakuli nelu sebelisa mihuma. Kukupa tuso kubabali mwa ma ofesi nikona nekupalile. Lulukile kuitusa luna beñi, kono nekupalile, bane bayepile mungelo nelubalifile N$1000 kakuli neba likile” nekubulezi Bulongo.

Nabulezi hape kuli kambesi kuli likubu neli basinyelize kambe mbonyi ya bona nekutuzwi kale. Nabulezi hape kuli neba lizelize ba babona za lifolofolo zanaheñi kono nebasika batusa. “Kona hamubona kuli mbonyi ye kikale ito tiba isali yenyinya, niku ica lusika ica kale. Simu ye kiyetuna kuli mukene mwahali mwa kona kuswala feela kwa toho ni kulila. Micoko ye inzi mo ibolile, halusa ziba sa kueza. Mezi ene lubata kuli azwe mwateni ki kale alusinyeza,” natalusize.