Ongeshefa yoRani Group oya yambidida osekundofikola yaMungwelume eshi ya yandja oitungifo yeeshako deesamende 300 Etitano pofikola omungwelume moshitukulwa shaHangwena.
Eesamende otadi ka longifwa okutungila ovanafikola ongulu yokulila opo ovanafikola va kale tava lile monhele iwa. Okwa didilikwa osekundofikola Omungwelume ya kale i na omhumbwe yongulu yokukala tai lile ovanafikola eshi ovanafikola va kala ashike hava lile pondje koshi yomiti.
Ofikola Omungwelume oya kala nokumona omakwafo ngaashi omuhandjo wofikola, omatalashe noipundi okudilila kungoloneya mukulu waHangwena Usko Nghaamwa.
Moshipopiwa shaye pefimbo ta yandje eesamende mwene wongeshefa yoRani Ali Darani okwa ti ehongo ola fimana kovanafikola shaashi ngeenge ofikola oi na oikwafifo ya wana eshi otashi yandje omhito opo ovanafikola va kale tave shi endifa nawa moilongwa yavo.
“Ketameko lomudo ou okwa li nda ufanwa kungoloneya mukulu waHangwena keumbo laye opo a lombwelenge onghalo yofikola Omungwelume eshi ya pumbwa ongulu yokulila ovanafikola. Ongehe okudja opo oda ninga onghendambala opo ndi yambidide ofikola neesamende nokutunga ongulu ya kula,” Darani ta ti.
Darani okwa ti ongeshefa yaye otai twikile nokuyambidida oikondo ya yooloka moshilongo.
Okwa twa ovanafikola omukumo opo veli honge noudinini vo va dule okupita nawa oitwa yopombada kexulilo lomudo.
“Ohandi tungu ofitola ya kula yoRani moMungwelume opo ndi dule okuyandja eemhito doilonga kovanyasha vomomudingonoko waMungwelume ile kovanafikola ava ve na e halo lokukala tava longo momafudo avo,” Darani ta ti.
Okwa weda po ta ti eshi kashishi oshikando shotete Darani ta yambidida moNamibia eshi natango omudo wa dja ko Darani okwa li a yandja outemba kongoloneya voitukulwa konooli opo va pewe ovanhu ve na oulema.
Omukulunhuwiliki welongo moshitukulwa shaHangwena Isak Hamatwi okwa ti okwa pandula unene ongeshefa yoRani Group eshi ina oshisho neefikola dili momhumbwe.
Hamatwi okwa ti eesamende odeu ya pefimbo liwa shaashi ofikola oya kala tai mono oixuna komhumbwe yongulu yokulila ovanafikola oule wefimbo lile.
Okwa ti natango ofikola yaMungwelume oya pumbwa omakwafo unene tuu omatalashe okulongifwa komuhandjo, onghee otai indile oshiwana opo shi uye okuyambidida ofikola.