Auleria Wakudumo 

Ehangano loRoads Contractor Company (RCC) nehangano lokutunga omaumbo hali ifanwa oNational Housing Enterprise (NHE) okwa udaneka okutunga omaumbo e li pomufika woshinanena kombilixa moNamibia. 

Omahangano aa okwa udaneka ngaha, sha ningwa eshi va shaina eudafano leedula nhano oku ka tunga omaumbo oshilongo ashishe ngaashi shi li momhangela inihamano yoNational Development Plan (NDP6). 

Eudafano pokati komahangano aa otali ka kwafela okuendelela po okuyandja eenhele opo tapa tungwa, okuninga omalongekido otete peenhele opo fiyo okokutunga omaumbo ombilixa. 

Pefimbo tava shaina, omukulunhuwiliki wo- NHE Gisbertus Mukulu okwa holola kutya natango onghalo yoishoshela yomaumbo onghene i li pombada moshilongo. 

“Onghene ohatu pandula eudafano eli hatu tula moilonga nena opo tu kwafelafane mokukandula po oudjuu ou. NHE otaka kwafela okutunga omaumbo omanga RCC e na owino mokuyandja omayakulo noikwafifo yokutunga omaumbo,” Mukulu ta holola ngaho. 

RCC ota ka kwafela okutuma ovapangeli novatungi keenhele odo da pumbwa okutungwa opate, omeva, olusheno naikwao ya wedwa po. NHE ota ka kala e na oshinakuwanifwa shokutunga omaumbo unene momalukanda opo va dule okuyambula po oprograma yomaumbo. 

Omukulunhuwiliki wo-RCC Dasius Nelumbu okwa holola kutya eudafano eli otali holola kutya ehangano lavo ole lilongekida okukwafela mexumokomesho loshilongo. 

Okwa ti omaumbo ombilixa itaa dulu okutungwa ngeenge kape na oitungifo ya wana noyongushu. 

“Fye ohatu ka kala ofye fimba i na ongodi ngeenge tashi ya keepate, omeva, oudjuwo, olusheno neemhumbwe dimwe da wedwa po. Eudafano eli otali tu pitike opo tu yandje ekwafo lotete okukwashilipaleka kutya edu ile onhele opo tapa tungwa opwa wapalekwa nokulongekidwa nawa omanga NHE ina tameka okutunga,” Nelumbu ta fatulula ngaho. 

Ovakulunuwiliki aveshe ova udaneka kutya otava ka longa noudiinini okukwashilipaleka kutya ova wanifa po oinakuwanifwa yavo nokukandula po omhumbwe yomaumbo moshilongo. 

-wakudumoauleria@gmail.com