KATIMA MULILO – Kampani yebona za kukoleka likoloti ili yezibahala ka Red Force, ilaezi simubuso kuli Likwambuyu wa Zwelopili ya Libaka za Litolopo ni Matakanyani, James Sankwasa, aikupele maiswalelo hala taba ya kulubelwa kuli nabulezi kanako ya mukopano wa sicaba la 11 Njimwana 2025 mwa Katima Mililo.

Kanako ya mukopano one ubuhiswa falikepe la Katengo katolopo la Facebook, likwambuyu na akaleza kuli nekusina tumelelano mwahala Red Force ni Katengo Katolopo ya Katima Mulilo, manzwi ao Red Force ilatula. 

Kampani ya Red Force netahize mapampili ane anyatezwi ni katengo katolopo, kusupeza kuli tumelelano iteñi, nikubulela kuli manzwi alikwambuyu nasina bupaki bwa niti nikuli nasundwa kimaikuto alipolitiki, kufetula taba ya kamaiso kuba manzwi akufitisa, liketisa hali atumela.

Kampani nefile likwambuyu lihola zemashumi amane kazelobapeli kuli aikupele maiswalelo, mi haiba inge asa ezi cwalo bakamuisa kwa Khuta Yepahami kuli ayo laelwa ku ambuka kubulela manzwi amaswe hala kampani ya Red Force. 

Selma Nangombe kuzwelela kampani ya Red Force naize buiswalo ni libizo la Red Force hamoho cwalo ni babeleki bateni limwakozi ya kusinyiwa mi nahatelezi kuli taba yeo seli “ye tuna.”

Mwaliñolo la simubuso kampani ne bulezi kuli likwambuyu hane azibahaza pampili yane aize kiya patisiso hala musebelezo wa katengo katolopo, naize nekusina tumelelano mwahala kampani ya Red Force ni Katengo Katolopo ya Katima Mulilo. 

Kamukwaocwalo kampani ya Red Force nehanyelize manzwi ao, kakufitisa mapampili ane anyatezwi kuba bupaki kuli tumelelano iteni.