Abraham Mwanyekange 

Omunashipundi woRucana Easter Tournament Simaneka Nendongo okwa ti omaudano oo haa kala ko alushe pefimbo laPaasa noneudo oko e li. 

Nendongo okwa ti elelo lodoolopa neudo ola kwashilipaleka oudano ou noN$550 000, ta ti koshimaliwa okwa wedwa molwaashi oinakuwanifwa nayo oya ninga ihapu. “Otwa weda mo ekopi loilusha nelalakano opo ngeenge va dengwa medingonoko lotete ihava ya komaumbo ndele natango nava kale ponhele yomaudano. 

Okwa ti elalakano loudano okweeta ovanhu pamwe, okuhumifa komesho odoolopa yaRuacana komesho okupitila momaudano, okuyandja eemhito kovadani va ulike oitalendi yavo osho yo okuyandja eemhito kovanangeshefa va dule okuninga omalandifilo vo va ka vatele ovakwapata vavo.

Ta weda ko kutya fiyo opaife inava mona omaupyakadi asha nghee otonamende ya tamekele mo2012, ta ti aishe otai ende nawa. 

“Ngeenge owa tale mo2012 modoolopa  omwa li ashike eenduda dovaenda dokunangala di li mbali ashike mopaife oda koya po-10, eshi tashi ulike nghee ovanhu va hokwa odoolopa yetu, sho nonatango ovanangeshefa vetu navo otava mono mo omauwa”, Nendongo. 

ORuacana Easter Tournament oi li ko mwaatatu fiyo ahamano Apiilili neudo, tai danenwa kokapale komaudano koRuacana. 

“Ileni mu shakeneke omanyakwa okudiilila keembinga neembinga daNamibia eshi tae uya a ulike oitalendi yao”, Nendongo ta ifana. Omaudano taa ka kala ko ongaashi, okatanga kokeemhadi kovakainhu novalumenhu, okatanga komokambaba, ovolleyball nobasketball. 

Nendongo okwa ti oimaliwa oyo ya tulwa poshitaafula otai ka longifwa moinyangadalwa aishe youdano mwa kwatelwa yo okufuta eespaana edi tadi ka findana osho yo ovashikishiva. 

-abbenghiai@gmail.com