ONGWEDIVA – Paife odula imwe neemwedi heyali okudja eshi omunambelewa wopolifi Sergeant Kornelius Nghitewapo (46) a kana, ashike fiyo onena ka pena ouyelele kutya oku li peni – oku li momwenyo ile ahawe. 

Ovakwapata vaye ova ninga eenghendabala doku mu konga ou ashike ina monika fiyo paife. Omufita Junias Nghitewapo oo e li omukwapata waSergeant Nghitewapo okwa koleka ta ti Kornelius okwe li xulwa okumonika momafiku 29 Desemba 2023. 

Ota ku hokololwa kutya omupolifi ou okwa li hadi mOshakati nokwa li ta longele poshitaashi shaShakati. 

“Otwa limbililwa shaashi ka tushi ngeenge mumwamememati oku li momwenyo ile okwa xulifa. Otwa ninga yoo vali eenghendabala doku ya komavalulilo ombaanga yaye opo tu tale ngeenge oshimaliwa shaye ohashi ku fwako ile okoshili,” ta hokolola.Onghee okwa ti nomavalulilo ombaanga yaKornelius nango otaa kulike kutya oshimaliwa shaye iha shi kufwa ko nombaanga yaye iha i longifwa vali. 

“Paife omavalulilo ombaanga yaye okwa pata manga opo tu tale ngeenge otai kombaanga e ke a patulule,” ta hokolola. 

Junias okwa ti opolifi oya ninga eenghendabala doku mu konga momilamba nomeva nelalakano lokutala ngeenge pamwe okwa wila momeva. 

“Ohatu li pula kutya pamwe okwa ya kondje yoshilongo molwashi otwa nyengwa paife oku mu mona,” ta ti. 

Okwa weda po ta ti ongodi yaye kai li momhepo otai ulike ye li xulwa okulongifwa momafiku 29 Desemba 2023. Mefiku omo taku fekelwa kutya omo a kana. 

Kornelius okwa dile komukunda Omundudu moshitukulwa shaHangwena. 

Okwa li a teelelwa okukala a tameka oilonga momafiku 8 Januali 2024 ashike koilonga ina ya ko. 

Oshiwana otashi indilwa kwau e na ouyelele opo shi kwatafane keenomola dongodi 0812090336 ile 0812045696. 

Omupopiliko wopolifi moshitukulwa shaShana Chief Inspector Thomas Aiyambo okwa koleka ta ti fiyo opapa opolifi kaina ouyelele kutya omulumenhu ou oku li peni. 

fhamalwa@nepc.com.na