Auleria Wakudumo
Omupresidente Nangolo Mbumba okwa lekela oilyo yomutumba wopashiwana noilyo yokabinete Etine lomafiku 13 Marsa 2025 ku na ashike oshivike Omunangekwapresidente Netumbo Nandi-Ndaitwah a ninge omupresidente omutitano waNamibia.
Mbumba ota ka yandja oshipundi shoupresidente momafiku 21 Maalitsa 2025.
Omupresidente okwa kala koshipundi oule weemwedi 14 sha dja eshi omupresidente Hage Geingob a xulifa momafiku 04 Febuluali 2025.
Mbumba okwa lela oshilongo pefimbo lidjuu eshi oshilongo sha li sha tuvikilwa po koshilemo shilaula oikando ivali.
“Omudo 2024 owa li omudo womashongo noululume koshiwana shaNamibia, molwefyo lomupresidente kwa li woshilongo Geingob,” Mbumba ta ti.
Noneudo, oshilongo osha taalelwa komashongo akula eshi sha kanifa Omukokolipresidente Sam Nujoma.
Nujoma okwa xulifa omwedi wa dja ko momafiku 08 Febuluali 2025.
Pefimbo ta lekele, Mbumba okwa nyanyukilwa pamwe noilyo yokabinete osho yo oongoloneya va dja koitukulwa ya yooloka.
Oongoloneya ova holola olupandu kOmupresidente Mbumba eshi a ninga etokolo pefimbo lidjuu okuya koshipundi ponhele yanakufya Geingob.
Okudja muApilili 2023, oongoloneya ova ninga oshitopolwa shombelewa yomupresidente, va dja koshi yelelo louministeli wexumokomesho ledoolopa noitopolwa yokoushayi.