Omupeduminista mouministeli weemina noikwanghono Kornelia Shilunga okwa yambidida eefikola domoshikandjohoololo shaKongo noikwafifohongo.
Oshivike sha dja ko Shilunga okwa li a shakena novanafikola keefikola ngaashi Ndjambeka Primary, Ondelinekela Primary School.
Omupeduminista ou okwa li a shakena vali novadali ovo a pa ouyelele kombinga yomayakulo ouministeli woikwamina.
Shilunga okwa ti elalakano okuyambidida ovanafikola ve li momhumbwe yoikwafifohongo molwaashi moshikandjohoololo shaKongo omwa didilikwa mu na ovanafikola tava dengwa koluhepo.
Okwa kumaida ovanafikola opo ve lihonge nondjungu noshoyo okufimaneka ovahongifikola vavo. “Ovadali kaleni tamu tu ounona omukumo wokulihonga. Ounona nava longwe efimano lehongo komaumbo,” ta ti. Okwa ti osha fimana ngeenge omunafikola ta mane elihongo laye shaashi otashi mu kwafele a mone oilonga nokuninga omuleli wokomongula. “Omunafikola ngeenge okwa mono oilonga ota dulu okuyambidida ofamili yaye,” ta ti. Kansela woshikandjohoololo shaKongo Efraim Shipindo okwa ti oikwafifohongo ya pewa ovanafikola otai ka twa ovanafikola omukumo ve lihonge nelitulemo. Kansela okwa pandula omupeduminista Shilunga molwokuyambidida ovanafikola shaashi okwa li ve li momhumbwe yoikwafifongo.
“Moshikandjohoololo shange omu na ovanafikola vahapu tava dengwa koluhepo. Ounona voukadona ova ninga oihakanwa yokufaula keetundi molwaashi kave na oututa woku va kwafela ngeenge ve li komafimbo opaushitwe,” ta ti. Okwa weda po ta ti ombelewa yaye oya tota po opologarama yokulandela ovanafikola voukadona oututa woku va kwafela ngeenge ve li komafimbo opaushitwe.
“Opologaram ei otai yambidida yoo vali okulandela ovanafikola oikwafifohongo. Ovanafikola vahapu ova mona ouwa okupitila mopologarama ei,” ta ti.
Okwa indila omahangano a yooloka novanangeshefa opo va yambidide opologarama ei noshimaliwa ile okulanda oututa noikwafifohongo.