Epangelo otali fala omayakulo kiipindi yaNdangwa

Home Oonkundana Epangelo otali fala omayakulo kiipindi yaNdangwa
Epangelo otali fala omayakulo kiipindi yaNdangwa

Iiputudhilo oyindji yepangelo, mwa kwatelwa uuministeli wuuhaku nonkalonawa oshowo uuministeli wiikwameni, oya tseyitha kutya otayi ka fala omayakulo koshigwana pethimbo lyiipindi yaNdangwa 

Uuminiteli wuuhaku owa hiya oshigwana shi longithe ompito yoshali shaMuhongi okwiikonakonitha okuza momasiku 30 Apiilili sigo 04 ga Mai nuumvo.

“Omikithi ndhoka tadhi konakonwa oshali ongaashi osuuka nombinzi ya Londa,” osho ya snhanga ngaaka. Uuministeli owa tseyitha kutya otau kala momauliko giipindi gOndangwa okuza esiku lyotango sigo lyahugunina.

Tau ti kutya otau kala wu na okatala komayakulilo, nowa ilongekidha okugandja omayakulo kukehe gumwe.

“Elalakano okuyambidhidha oshigwana shi tseye mpoka sha thikama, nuuna iizemo itayi hokitha, shi vule okutameka epango omanga pe na ethimbo,” wa fatulula ngaaka.

Uuministeli owa hiya oshigwana shi thike mengathithi. 

Uuministeli wiikwameni nawo otau hiya oshigwana shoka shaa na uuthemba woshilongo opo shi longithe ompito ndjika, shi thike momauliko giipindi mOndangwa. 

Omugandji gomauyelele muuministeli wiikwameni, Margaret Kalo, okwa ti oya tameka noprogalama yokugandja uuthemba kwaamboka yaa na sha okuza momasiku 05 gaFebuluali noshinyangadhalwa shika otashi ka hula mo30 yaJuli nuumvo.

Ta ti, otaya longitha oompito adhihe okukwashilipaleka kutya oshigwana osha mona uuthemba awuhe woshilongo.

“Otatu gandja uuthemba miitopolwa ayihe 14. Otwa ndhindhilike twa gandja oonzapo dha pita 9 881 nuumutse wu vule 14 500 okuza mu Febuluali nuumvo,’’ ta ti ngaaka.

Kalo ota kumagidha oshigwana miitopolwa ayihe yi li 14, opo shi longithe ompito ndjika okumona uuthemba, naamboka ya kanitha uuthemba wawo, naya ningulule omayindilo. 

Ta ti, kehe ngoka taka ninga eyindilo lyokamutse nenge lyonzapo yevalo oshikando shotango, ita futu sha.

“Mboka taya ningi omayindilo guumutse olutiyali nenge iikando ya kola po pwiiyali, otaya futu N$150 omanga mboka taya ningulula omayindilo goonzapo dhomavalo taya futu ashike N$100,” ta fatulula ngaaka.

Ta ti, uuthemba owo olisinisa yomuntu kehe, okukwashilipaleke kutya okwa yambukile peni oshowo uukwatya womuntu.

-vkaapanda@nepc.com.na