ONESI- Oshiwana sha dja koitukulwa ya yooloka okwa li sha holoka momwaalu muhapu okufindikila elenga linene loshitunda shUukolonkadhi Chief Daniel Shooya oo a fudikwa Olomakaya komaendo okOmuthitu Gwatshishele mOmusati. 

Shooya okwa xulifila meumbo laye komukunda Oshika momafiku 31 Okotoba. 

Okwa li e na omido 97. Okwa pewa efudiko olo papangelo nokwa li a tumbalekwa molwoilonga yaye.Ovaleli vopamifyuululwakalo, ovaleli vopapolitika novafitaongalo ova tanga Shooya onga omulumenhu ehe na okatongo. Shooya oo a kala omuleli wopamufyuululwakalo oule womido 39, oye umwe womeehamba nomalenga a lela omalelo opamufyuululwakalo efimbo lile. 

Omupresidente Nangolo Mbumba okwa tanga Shooya onga omulumenhu kwa li omunambili nokuhole elandulafano. “Shooya okwa tula po ombili moshitunda shaUukolonkadhi noukumwe. Ina ndi uda ovanhu tave li denge mumwe pefimbo lewiliko laye,” ta ti. 

Okwa pandula Shooya mowa ewiliko laye liwa nokulonga noudinini okuyambidida oshiwana. 

Mbumba okwa ti omelelo opamufyuululwakalo okwa fimana moshilongo molwashi otaa lele oshiwnaa nombili nokutula po omalandulafano. 

Omunashipundi womalelo opamufyuululwakalo Gaob Immanuel |Gaseb okwa ti Shooya kwa li omulumenhu ehole okuyambidida oshiwana shi momhumbwe yoikulya. 

“Shooya okwa lwifa ondjala moshitunda shaye molwashi ka kwa li ehole ovanhu tava dengwa kondjala,” |Gaseb ta ti. 

Okwa weda po ta ti Shooya okwa li a tota po omaanda oilya a nuninwa okuyambidida oshiwana. 

Immanuel okwa ti Shooya okwa fiya po omwaka wa kula moshiwana. 

Okwakumaida oshiwana shomoshitunda shaUukwol onkadhi opo shitwikile okukala nombili noukumwe. Okwa fiya po ounona 10 nomukulukadi waye. 

-fhamalwa@nepc.com. na