SANGWALI – Shikati Borniface Lutibezi Shufu wa Khuta ya Sizo ya Mayeyi ukupile mubuso kubeleka ni likhuta za sizo kubona kuli sicaba sifumana kabelo yelukela kwa limbule za nyambe. Nabulezi zeo kanako yakutabela mukiti wabu 32 wa Sizo wa Silimo wa Batahsara, Lasunda viki yefelile kwa Sangwali. Ili one utabelwa mwatasa muto otwi: “Kubabaza Sizo kuli kube ni kabelo kwa Limbule za Nyambe.” 

“Nibata kubulela patalaza kuli musebezi wakubabalela limbule za nyambe kikalulo ya sizo sa luna mi uswanela kuzwelapili. Lulakaza kubeleka ni mubuso ni tutengo twa mubuso kubona kuli sicaba saka sifumana kabelo yelukela kwa limbule za nyambe, ili kuli bubotana ni kutokwa misebezi lifukuzehe,” nekubulezi Shufu. 

Mulena wa Mayeyi nabulezi hape kuli mubu onuhiwa kuba olikana 40 pesenti wa sizo mwakamaiso yahae ubulukezwi limbule, mi taba yeo ikana yangiwa kuli ki tulo. “Ikungulezi nombolotuna ya sicaba saluna kwatuko, sihulu hamutalima kuli lupila mwahala libakanyana ni libaka zapabalelo ya lifolofolo,” nabulezi. 

Mukiti no tahisize kupulo mwasikiliti kakuli ki lapili, Mulena wa Khuta ya Mafwe George Simasiku Mamili VII, Mulena wa Khuta ya Mashi Joseph Tembwe Mayuni, hamoho cwalo ni Ngambela wa Khuta ya Masubia Albius Milinga Kamwi kutaha hamoho kwa mukiti. Kasamulaho sikiliti sa Zambezi kwamulaho nesi mangana ni misunga ya ketululo ya mishobo. 

Ngambela wanaha Elijah Ngurare naize kutaha hamoho kwa likhuta zene za sizo zefumaneha mwa sikiliti kuto tabela mukiti wa Batshara, kisisupo sa kuli kuna ni moya omunca wa sepo mwa sikiliti sa Zambezi. Nahatelezi kuli shutano ya mishobo iswanela kutisa kutwano isiñi kauhano, kacwalo sikiliti sa Zambezi sibonisize swalisano yeo. 

“Luswanela kutabela shutano yeo, isiñi kunyemelana, lubatu babande ni ba ba tiile kabaka la la shutano yeo. Nelusika keta kuli lube molu inezi. Mi haki mafosisa kuba molu inezi. Lu inzi molu inezi kabaka la kuli kimo luinezi. Kona simuluho ni mafelelezo,” nekubulezi Ngurare. Nabulezi hape kuli sicaba sa Mayeyi siswanela kuikuhumusa kabaka la bokukwabona ni baetapili ka bundume bwa bona. 

Nasusuelize baeteleli ba sizo kuteleza kwa sicaba ni kuswalisana hamoho mwa sikiliti, mwanaha mane ni lifasi kaufela. “Khuta ya sizo yeli sioli iswana sina nkwana yeli mukungulu ye eza lilata, kusupeza kuli hakuna toloko. Luswalisane nihakuna ni ze lu kauhanya. Kakuba mubuso, luka eza molukonela kaufela kutusa sicaba kaufela sa naha Namibia, ili sa butokwa mwakutahisa zwelopili,” nabulezi. 

Mukiti notisize hamoho sicaba sa Mayeyi ni mishobo yeñwi mwa sikiliti sa Zambezi, hamoho cwalo ni babañwi kuzwelela mwanaha Botswana.