MUBIZA – Sikolo sa Mubiza mwasilalo sa Bukalo nesifumani neulo ya waya yakuyahisa lukwakwa kuzwelela kwa katengo ka Social Security Commission (SSC) Labutanu. Hane abulela kanako yaku amuhela waya ya masheleñi alikana N$45 495, muzamaisi walikolo la tuto mwasikiliti sa Zambezi Josty Kawana, naitumezi kwa katengo ka SSC kaneulo yana ize ika bapala kalulotuna kulwanisa butata kwakutokwa kamaiso yakuikamaela feela fasikolo.
“Nitabile hahulu kuli katengo ka Social Security Commission ni kamaiso yateñi mwasikiliti neba alabezi kwakupo yaluna. Nelukupile kubabañata mwasikiliti, kuekeza kwabutata bwakuli luzwa mwa nako yabutuku bwa Covid-19, kono ba Social Security Commission nebakonile ku alabela kwakupo yaluna, kacwalo luitumela kubona,” nekubulezi Kawana. Naelelize hape sikolo kubabalela lukwakwa kuli ikone kuba puluko yende kwa kampani yefile neulo.
“Kwabanabasikolo nabona kuli mutabile, kono ni ziba kuli kamita kimina babasinya lukwakwa lwa sikolo. Niziba kuli lukwakwa haluka beiwa hakuna kuba ni minyako yemiñata, kono halutokwi kuli kasamulaho anakonyana mukala kusebelisa minyako yamina kukena mwasikolo. Mubone kuli musebelisa minyako ye ezizwe, ni mikupa kuli mubabalele katokomelo lukwakwa lwa sikolo kakuli kikwabutokwa hahulu,” nekubulezi Kawana.
Mwamanzwi ahae muetapili wakatengo ka SSC mwasikiliti sa Zambezi Naomi Sheetekela naize katengo nekalemuhile tokwahalo yasikolo yakubata kunyinyifaza kuikamaela feela fasikolo, kacwalo kitabo ni nyakalalo kuli katengo neka iketezi kutusa sikolo kakufa neulo ya waya. “Katengo ka Social Security Commission kanga taba yakutusa likolo kuba yabutokwa. Lulumela kuli tuto kiyona sinotolo sabukamuso sakata kwabayahi kaufela mwanaha Namibia. Lwa ikuhumusa kubeleka hamoho ni likolo zeswanasina Mubiza kutusa kubona kuli baituti kaufela bafumana tuto sakata,” nekubulezi Sheetekela.