KEETMASHOOP – Bayahi ba Aus, Luderitz, Rosh Pinah ni Orangemund nebataselizwe ki pula ya maliha, yene taha ni kubata ni moya omutuna mwalibaka zeñwi zasikiliti sa //Kharas viki yefelile.
Muyemeli wa Silalanda sa !Nami#Nus Susa Ndjaleka naize balimi mwasilao sa Aus nebalatehezwi limunanu zelikana 200, mi pula nesinyize miyaho yebalwa.
“Mwasilalo sa Luderitz 7 batu bamashumi asilezi neba tutisizwe kasamulaho pula isinya limbashu ni libyana zabona kwamafelo aviki yefelile,” nabulezi.
Muyemeli wasilalanda sa Orangemund Lazarus Nangolo nabulelezi New Era kuli tolopo netaselizwe kimoya omutuna, one usinyize likota ni kutimisa mulilo wamagesi kone kubile teñi.
Katengo kakabona zamikwakwa yanaha neka kwalile mukwakwa wa Rosh Pinah-Aussenkehr nakonyana bakeñisa kukoloba ni kutelela kone kutisizwe kipula yeñata mwalibaka zeñwi za //Kharas.
Ndjaleka nazwezipili kubulela kuli nebabile ni litohonolo kuli nebafumani lico, likubo, ni mamatiresi kuzwelela kubabafa lituso kwasicaba, kasamulaho akututisa bayahi kwamuyaho wa Benguela, mbowela watolopo yefumaneha kwaliwate.
“Batu ba bakutile kobapila kono butata seli kuli bayahe sinca mandu abona,” nabulezi. Naekelize kuli bayahi bao bane batutisizwe nebana nikufiwa feela lico haneli mandu abona bana niku alukisa bonabeñi. “Kubonahala kuli taba yeo neba sika iutwisisa, mi fa sebabata kuli ofesi yasilalanda ibatuse,” nabulezi. Naekelize kuli ofesi ya Ngambela wanaha nekupile Katengo ka Sikiliti sa //Kharas kueza patisiso yalisinyehelo nikutambeka piho yeo kuli kufumanwe linzila zakutusa balimi ni sicaba.