Sipokola sanaha Namibia silaezwi kiKhuta Yepahami kukutiseza muzamaisi wasipokola, yana hapelelizwe kutuhela musebezi mwasipokola mwasilimo sa2019 amano hana kuyobelekela kwaMariental.
Khuta Yepahami ise ilaezi kuli yene ili Mutatubi Yomuhulu George Mathe, akutisezwe famusebezi mwahala mazazi amashumi amalalu. Taelo yeo nekalile la 23 Mbuwana. Mathe nazusizwe musebezi kakapelezo mwasipokola, kasamulaho akufapana niyanali yomuhulu wasipokola mwasikiliti sa Zambezi Karel Theron. Mathe kihaya kwakhuta kuyo kwalula muzeko wakuhapelezwa kusiya musebezi.
Mwakatulo yefilwe kiKhuta Yepahami yebonwi kiNew Era, yene filwe la 23 Mbuwana 2022, Muatuli George Coleman naize yomuhlu wasipokola Sebastian Ndeitunga napalezwi kutatulula lipilaelo zaMathe, mi azwelafeela pata nikunyatelela kushimbululwa kwahae. Kufapana kwaMathe ni Theron nekukalile bakeñisa kuli pili Theron asika ketiwa kuzamaisa sikiliti saZambezi, Mathe nahulisizwe kuba mutatubi yomuhulu kukala la 1 Muyana 2016. Kubihiwa kuli liñolo lahae nelitoloka kuli nana ni kuokamela mutayi walitaba zabubangoki mwasikiliti.
“Mwamubonelo waka, kalulo yeo netisize tibelelo kumubilaeli. Nihaike mutayi wo nosika eziwa, mubilaeli nasiilwe mwalibala. Litaba zesikai zana filwe kuli abatisise nali amuhilwe kataelo yamuzamasi Theron. Bupaki bukenile kuli Muzamaisi Theron nasalumelelani ni mubilaeli,” kubaleha katulo. Katulo ibulela hape kuli Mathe una nikukutisezwa kuba “Mutatubi Yomuhulu mwasikiliti sa Zambezi, fasitulo sesiyelela nizibo yahae kukala la 1 Njimwana 2019. Bane bazekiswa balaelwa kulifa lisinyehelo zahae. Taba yazusiwa famukoloko mi ingiwa kuli ifelile.”
Hana kupilwe kualabela falitaba zeo, Mathe naize katulo imutabisize, nikuli ibile hande. “neni betekilwe nikuhapelezwa litaba zene nisazibi kiyomuhulu wasipokola mwasikiliti, Muzamaisi Theron. Neni bilaezi Kuyomuhulu waSikokola, kono lipilaelo zaka nelisika utwiwa,” nabulezi. Naize uitukiselize kukutela famusebezi “nikubeleka nibatu babasepahala.” Hana kupilwe kuli abulele, Ndeitunga naize nasazibi katulo. “Hani zibi katulo yeo. Niswanela kukandekisena ni mutayi obona zamilao,” nekubulezi Ndeitunga.