!Nona ǀgôan hîa Sorosi !nubusina ūhâ ǀō-aisa ǀgôan di skolkha, Moresonni tsî Dagbreek hâkha din ge ǀasa ǂnû tsî !narimā-ūs !aroma hâde Tweyapo ǁAu!khōs ǂNûiǂgāsa xu ǀkhaeb ase ge !khō!oa. Nē ǀkhaeb hîa N$120 000 xa ǀhaob ai ge ǂgandi ge, Moreson Skoli tawa ge hâ i ǁaxasib tawa  ge ǁkhaeǁnâhe. Nēs ge hoa ǀgam skolkha !aroma ǁnāti ī ǀkhae-e !khō!oas !aroma a ǂguro !nā. Nēb ge kaise a ǂhâǂhâsa tsî ǀō-aisa ǀkhaeba, ǁnāti ī ǀgôan hîa ǁî-e xu tsēsa xu tsēs ǁga hâmâs !aroma !gâbasen hân !gao. Dagbreek ǀŌ-aisa Skoli  di Skoldanab, Paul du Plessib ge ǁnā ǁaxasib tawa ge mî “Sida skolǀgôan ge !nāsa ­ǁaeb ǁîn ûigu diba nē huisenūxūna xu ûihâ. ǁîn !aromas ge nēsa ǀgui !khai-e xu nau !khai-i ǁgā īs dis ǀguisa hî tama hâ, ǁîs ge ǁîn di kharob ase ī, ǁan!khais ase ī tsî ǁîn !hūbaib ase hâba ni. Nē ǂnû tsî hâma-ūs ǂnû!khaidi ge buruxa ǀgaun !nâ ­ǁîn ûiga nî ǀkharaǀkhara,” tib ge du Plessiba ge mî. ǀKhaeb hîas Tweyapo ǁAu!khōs ǂNûiǂgāsa ge a māb ge a ǁîn di ǀhûhâsib !nâ ǁguiris proxrammi di !â. Thandi !Gaoses, Tweyapo ǁAu!khōs ǂNûiǂgās di direkters ge ge mî “Tā-i ge ǀgui ǀgôa-i tsîna ǁî-i di sorosi !nubusin ra hā-ū ǁgoaǂuidi !aroma nî ǁaraǂuihe. Nē ǂnû tsî hâmâ-ūs ǂnû-ai!naodi ge nēpa xu naupa īs dis ǀguisa hî tama hâ, xawe !norasasib, ǁîǂgom!gâsens tsî ǀguitikō !ēde hōs tsîna ra ǂnûǁkhaeba.” !Nāsa omaridi khoen !aromab ge nē ǀkhaeba supuse tsâs tsî !âubasensa ge hā-ū. Christophine Alves, ǁnā axarob Dannyb ǁîb tsîn ǀkhaeba ge !khō!oab di ǁgûs, ge ge mî “Sida ge Dannyba nē !nā-omsa xu nau !nā-oms ǁga gere tanibagu, xaweb ge ­ǁîba nēsi aitsama a hâmâbasen ǁkhā. Nē-i ge kaise a kai xū-e sida oms khoen !aroma.” ǀNîhâ ǁgûs, ǁîs ôa-i tsîn ge ǀkhaeba a !khō!oas, Christine Likuwas ge nē ǀkhaeba “ǁîn ǀasa ǀnūgu” ase gere ǁgui!ā. “Kaise ta ge ǂgaoba xu hâ gangansa ra mā du. Nēs ge ǂnû-ai!naos ǀguisa hî tama hâ, xawes ge aitsama mābasensa sida oms !nâ go hā-ū,” tis ge ge mî.