Xoa-ao-i: Tunomukwathi Asino
ǀAeǁgams
Otjozondjupab ǀAwa!namn ǀKharisi Danab, Komisares Armas Shivuteb ge ra mî, ǁnā ǀkharib ǁaupexa 2 000 ǀawa!namna ǂhâba hâsa ǂkhawadība ǂâuǀoa hâse ǁkhaes !aroma. Komisareb ge nēsa ǁnāpab ge ai!â gere ǂoa Fraitaxtsēs ai 61 ǀasa ǀawa!namn hîa ge ǁkhāǁkhākhâidi ǀkha a toana gere ǁkhoreǁhare ǁaeb ai. Nē ǀawa!namn ge ǁnā ǀkharib !nâ !oabade sī mās !aroma a ǂhomisa. ǂHôamāǂuis hîab ge New Eraba a ǀgūǀkhās !nâb ge Shivuteba ra mî, !khō!gâsa !gôab ǀawa!mn nē ǀkharib !nâ nî sîsense in ge a 2 992. “ Nēs mâ xawe da ge sida nēsi 1 012 ǀawa!namn ǀguina hoa ǀkharib !nâ ūhâ 27 ǀawa!namn beridi tawa,” tib ge Shivuteba ge mî. 1 980 ǀawa!namn ge Otjozondjupa ǀkharib !aroma noxopa a ǂhâbasa ǀkhai!nâ soade ǀoaǀoas !aroma. ǁNā ge ǀasase a ǁkhāǁkhākhâihetoa 61 ǀawa!namn ge 16 !kharaga ǀawa!namn berodi nē ǀkharib di di ǁga ge sîǂuihe. Nē !gôab ge 20 tarekhoedi tsî 41 aorekhoegu tsîna xu a !amǁaresa. Nē ǀasa ǀawa!namn ge !nani ǁkhâga ge !khōǂgā hâ i ǁkhāǁkhākhâide ge !khō!oa Ruben Danger Ashipala ǀAwa!namn ǁKhāǁkhākhâis !Khaib Ondangwas hîa Oshana ǀKharib !nâ ǂnôas dib tsî Simon Mutumba Mutumba ǀAwa!namn ǁKhāǁkhākhâis !Khaib hîa !khawagas-aiǂoas ǀkhāb Katima Mulilos hîa Zambesi ǀKharib !nâ ǂnôas tawa. ǁKhātin ge nē ǀasa ǀawa!namna koro wekhega ge !khōǂgā hâ i ǁkhāǁkhāsende, Otjozondjupa ǀKharisi ǀAwa!namn Dana beros hîa Otjiwarongos !nâ ǂnôas tawa gere !khō!oa hîa ge ai!â gere ǂoa wekheb Fraitaxtsēs ai gere ǀamse. !Khanni nē kurib dib !nâb ge, Ministeri !Norasasib tsî ǁAwosasib dib, Major-Generali Charles Namolohba ge mî, !gao!gao ǁkhāǁkhākhâidi hîan !awa!namna ra !khō!oadi ǁkhāǁkhāsens di ǀams ti ǂâibasen tama hâsa, xawen ǁîna ais ǁga ǁkhāǁkhāsen tsî ǀasa ǂande hōbasen tsî Namibiab ǁaes tsî ǀhûhâsiga ǀgapiǀgau !oabade nî māsa. ǁKhā ǁaxasib tawab ge Namolohba ǀgaisase gere !khâikhom ǀawa!namn hîa sîsen ǂgao tama i tamas ka io !aruǀî ǁkhāǁkhāsens tsîna dī tama xawe ǀgapiǀgapihesa ra ǂgaona tsî gere mî “Sa sîsengu xats nî ǂnoabahe’ xuige ǀorose xū-e dī tamase sadu berodi !nâ ǂûǀû tsî ǂhâbasa !harib ai sîsen tsî ǀgapiǀgapihesa !oaǂui,” ti.