Aakalimo yomomapandaanda gaDanger Ashipala oshowo Monica Geingos moSwakopmund oya nyenyeta komalungula sho omagumbo, oohofa oshowo omapandaanda gawo taga kunguluka omeya sho anuwa omunino gumwe gwatopa.

Omukalimo gumwe okwa nyenyeta kutya oya penduka ongula yEtitatu yeli kohi yomeya kaaye na mpoka taya piti okuya kiilonga, omanga yamwe iinima yawo momagumbo ya yonuka.

“Shika hasho oshikando shotango, otwa kala nokupula elelo lyondoolopa lyi yelekanithe pamwe omapandaanda getu nomakwawo oshoka hoka tuli okwa sulukila, ihe iha shi ningwa, paife otuli momeya,” ta nyenyeta ngaaka.

Elelo lyondoolopa lyoSwakopmund olya ti olyili metifa okuopaleka noku hupa mo omeya ngoka gayi sigo omomagumbo gaakalimo.

Omugandji gomauyelele melelo lyondoolopa yaSwakopmund Linda Mupupa okwa ti, oyali ya lopotelwa eyelu momapandaanda Danger Ashipala oshowo Monica Geingos.

Ta fatulula kutya omeya ngoka oga e twa komunino gomeya ngoka gwa topa sho gwa tetwa kembakumbaku omanga aaniilonga kwali taya longo iilonga yondoolopa momundhingoloko.

“Opaipi ndyoka ya topa ngaashingeyi oya pwa okulongwa omutenya gwEtitatu, nomeya ngoka gayi momagumbo gaantu otaga hupwa mo,” Mupupa ta ti ngaaka.

Mupupa okwa ti, elelo lyondoolopa ota li gandja ombili kwaashoka sha holoka po.

Ta gwedha po kutya oshigwana nashi taambeko ombili yawo, ka kwali oshiningilwa wina ihe epuko ashike lya ningwa po.

Ta kumagidha oshigwana shi tsikile okulopota iiningwanima tayi holoka momindhingoloko dhawo opo elelo lyondoolopa lyi gandje omayakulo gomeendelelo.

“Elelo lyondoolopa ota li tsikile okuyakula aakalimo yawo pethimbo ngaashi  yuuvaneke,” ta ti ngaaka.

Mupupa okwa ti uuna oshigwana sha tsakaneke ominino dha topa momindhingoloko dhawo na shi dhenge konomola +264811244257.

vkaapada@nepc.com.na