Auleria Wakudumo 

Ongudu yoSwapo oya holola edina lomuulikwa oo teke i kalela po momahoololo ookansela moshikandjohololo shaNgwediva. Omahoololo ookaansela moshilongo ashishe ka kala ko muNovemba neudo. 

Johannes Ngololo oye a hoololwa a kalele po ongudu yoSwapo momahoololo taeya. 

Omukwatakanifi woSwapo moshitukulwa shaShana Sam Nangolo okwa holola kutya ovanhu vanhe ova kufa ombinga momahoololo aa sheli kolelela komulandu woSwapo. 

Okwa ti omulandu woSwapo ohau pitike ovalumenhu vavali oshoyo ovakainhu vavali va kufe ombinga momahoololo oukansela. 

“Ava va kufa ombinga ovo Alfeus Nambala, Johannes Ngololo, Ulalia Katonyala naHileni Nashongo na Ngololo oye a mona omawi mahapu nokwa teelelwa a kufe omahoololo muNovemba,” Nangolo ta ti. 

Nangolo okwa ti ongudu inai mana okuninga omatokolo a xuuninwa kombinga yovakufimbinga moikandjo ikwao moshitukulwa shaShana. 

“Ngaashi omulandu wongudu yoSwapo, otwa tuma omadina oikandjohoololo ikwao ngaashi Okatana, Ondangwa, Okaku, nUukwiyu-Ushona,” Nangolo ta yelifa. 

Nangolo okwa tanga Ngololo onga omumweni ena elandulafano. 

Okwa ti ongudu yoSwapo oyeli nekela Ngololo shaashi omunyasha nove wete ota ka kwafela ovanhu aveshe moshikandjohololo shaNgwediva. 

“Ohandi indile ovaNgwediva va hoolole omuuhoololwakansela woSwapo,” Nangolo ta ti. 

Johannes Ngololo otai ponhele yakansela mukulu, Andreas Uutoni oo a holola kutya ota yi moshipundi shetulumuko. 

Meenghundafana naKundana Uutoni okwa ti kena ehalo lokukufa ombinga momahoololo oneudo shaashi okwa hala okuyandja omhito kovakufimbinga vamwe unene ovanyasha. 

“Ondi wete onda kwafela oshiwana shaNgwediva sha wana nondelineekela ou teya ota twikile apa nda xuulila,” Uutoni ta ti. 

-wakudumoauleria@gmail.com