Andreas Weyulu weedula 39 ou vati a kwata okamatyona keedula 17 onghonga okwa anyenwa omhito yokulifutila mo modolongo. 

Okwa holoka momhangu yamengestalata waNdangwa onghela. 

Oshibofa shaye osha undulilwa komafiku 11 Novomba 2025 nelalakano ku ningwe omakonakono omoule. 

Mvula vati okwa kendabala okumweneka okamatyona eshi e ka hekeleka noshimaliwa shoN$200. 

Oshiningwanima eshi vati osha ningwa muJanuali neudo nosho yo oshivike sha dja ko komukunda Ehafo LyaNelulu moshikandjohoololo Uukwiyuushona moshitukulwa shaShana keumbo lomufekelwa. 

Omukulunhu koshikondo shokukonakona oimbuluma omupedu Commissioner Fredrik Ndjadila okwa hokolola ta ti omufekelwa efiku limwe okwa li tava di keendingosho nokamatyona ndele te ka pula opo ke mu findikile keumbo laye. 

Opolifi oya hokolola tai ti omufekelwa okwa nukila okamatyona ndele te ka kwatwa onghonga. 

Opolifi oya hokolola tai ti natango oshivike sha dja ko omufekelwa okwa ufana okamatyona keumbo laye ndele te ka kwata onghonga lwoshikando oshitivali. 

Nakuninga oshihakanwa okwa twalwa koshipangelo opo a ka ningilwe omakonakono opaunamiti. 

Otaku hokololwa kutya omu fekelwa nokamatyona ovashiinda. 

Nakuninga oshihakanwa oku li mondodo onhi-8. 

Eshi a kwatafana naKundana onghela, xe yokamatyona okwa hokolola ta ti ouyelele ou okwe u lombwelwa komukainhu womufekelwa kutya oha i moixulo nomonamati. 

Okwa hokolola ta ti natango omufekelwa ou okwa li a kwatwa po ndele ta pewa obooloha konima eshi vati a kwata okatekulu kokamati onghonga. 

Okwa ti omukainhu womufekelwa okwe mu lombwela kutya vati omufekelwa naye oha kendabala oku mu enda konima ngeenge ve li monduda. 

“Paife omonamati wange oha kala ta pwaalala kofikola molwaashi ota hepekwa koupyakadi wopamadilaadilo. Otwa kendabala opo tu mu twale kovaxungimwenyo,” ta ti. -fhamalwa@nepc.com.na