Marythar Kambinda
Mueteleli waKhuta YaMashi, mulena Joseph Tembwe Mayuni ukupile mubuso kutalima taba yamilulwani yalikhuta zasizo mwasikiliti sa Zambezi. Nabulezi zeo kanako yakutabela mukiti wasizo waTulikonge kwamuleneñi wahae waChoi, Lasunda viki yefelile.
“Mubu kisimbule sabutokwa mi ukona kutahisa kuhula kwasifumu, ili kalulo yekatisa kuhula kwasicaba. Nihakulicwalo, sisitataliso kikutokwa milulwani mwahala likhuta zasizo,” nekubulezi Mayuni. Naekelize kuli, “pilaelo yeo nefitisizwe kanako yamukopano wanaha wakuambola zamubu kasilimo sa 2018, mi nehatelezwi kanako yamikopano yapiho yaketengo kane katalima zamubu wabashemi bakale.”
Mulena nafitisize hape pilaelo hala mafu asweli kuezahala kwa Kongola, mi buñata bwaona anungahanywa kwalitaba zalikomano mwamabasi, kukwaeza mwakamaiso zabucwala ni kutokwa buiswalo. “Kitaba yebilaeza kubona lika zecwalo mwahala sicaba.
Halukoni kutalimela sicaba saluna inge siya mwalineku leli cwalo. Sizo saluna sa likute hasiyeleli ni likezo zabubangoki zesweli kuezahala,” nekubulezi Mayuni. Mulena nabulezi hape kuli sicaba sa Bafwe sizwisezapata kupila kakutwano ni kukutekana ni mishobo yeñwi.
“Luzwelapili kupila kakozo ni maMbukushu, maKwedam, maYeyi, maSubia, maTotela, maMbalangwe ni maLozi sina kamita mi lubata kuzwelapili cwalo,” nekuhatelezi Mayuni.