Fares Johannes nedina la shiivika nawa ‘Tate Eba’ ota ti okwa pewa ounongo wokumwenyeka oshiwana komaulikilo oipindi osho yo okuxwaxwameka oipindi. 

Omunyasha ou weedula 25 okwa shivika nawa okupitila komalungula eshi a kala alushe ta ningi ouvidio tava yolifa ovanhu. 

Ngeenge owa hange Tate Eba ta popi ta hepaenene okupopya ewi lomunailonga woradio yoNBC koshiwambo oto fuuka. 

Naashi osha eta opo eli luke edina tate Eba osho sha hala kutya oha popi naana afa Eba Haikuti omunailonga koradio yoshiwambo yoNBC. 

Omulumenhu ou natango, oto hange e li komalungula ta lesha eenghundana ngaashi naana ovanailonga vokoradio hava lesha. 

“Ameenyakwamokupopya, onda pewa omaano okuxwaxwameka oipindi osho yo okupopya handi hepeenene omawi ovanhu,” ta ti. 

Okwa ti elalakano okumwenyeka ovanhu osho yo okunana ovalandi va ye vaka lande oinima yavo kongeshefa. 

Tate Eba okwa weda po ta ti eshi oye shi ningi nelalakano lokukonga okamaliwa kaye. 

“Ohandi xupa ashike moilonga yokumwenyeka ovanhu ile okuxwaxwameka oipi n d i yomahangano a yooloka,” ta ti. 

Okwa ti ovanangeshefa ove hole okumulongifa a xwaxwameka keengeshefa davo shaashi ove na elineekelo mu ye kutya ohanane ovalandi vahapu. 

“Ngeenge ova hange ndi na embako handi popi ndafa mee Eba ovanhu aveshe okwaame ashike va pwilikina,” ta ti. 

Okwa ti ovanhu ove hole okufanekwa naye molwaashi ova panda oilonga yaye. 

Okwa ti longele komaulikilo oipindi a yooloka ngaashi Ehao, Ongewediva, Eenhana, Olufuko osho yo Ondangwa. 

“Omunangeshefa keshe okwa manguluka okukwatafana naame opo ndi dulu okuxwawameka oipindi yongeshefa yaye. Osha fimana ngeenge eengeshefa dadi shivika okupitila movanhu ava tuna ounongo wokupopya,” ta ti. 

Tate Eba okwa ti luhapu ohava longele pongeshefa yoKambwa Trading cc. 

“Ohandi pandula Kambwa Trading cc shaashi oye umwe a kwatwa nge omukumo nokukala ndi shivike nawa moshiwana,” ta ti. 

Okwa ti mopaife ngaha ota longele komaulikilo oipindi aaNdangwa. 

“Ohandi hangika pokatala ka shangwa Kambwa Trading cc,” ta ti. 

fhamalwa@nepc.com.na