Auleria Wakudumo
Minista womauyelele nomakwatafano opaungoba Emma Theofelus okwa pula elongifo louyuuki moshiningwanima shikumwifi shediapo lokaana keedula nhano, Ingrid Massdorp, mOkahandja.
Edi Minista okwe di holola poshivilo shedjaleko lomanguwo ovalihongi voUniversity of Namibia (Unam) okudja koiputudilo ine yokonooli, onghela monhele yomaulikilo opaupindi mOngwediva.
She likwatelela kolopota yopolifi, otakuhokololwaMassdorpakwatwa keenghono, ta dipawa nokuekelwa koshi yonhopa mOkahandja. “Atushe otwa pumbwa okuxulifa po nokukatuka onghatu yopombada moshiningwanima eshi, mwa kwatelwa ikwao ihapu oyo hai ningilwa ounona ovo itava dulu nokulipopila mokati ketu,” Theofelus ta ti.
Theofelus okwa weda po kutya Ovanamibia ova pumbwa okukala ve hole notava amene ounona keembinga adishe doshilongo.
“Ngeenge otwa nyengwa okuamena ounona ava itava dulu okulipopila, nokulifikamena po voo vene nena otwa dopa oilonga yetu ongovakulunhu voshilongo eshi, twa dopa oilonga yetu ongovadali,” Theofelus ta twikile.
Theofelus okwa holola yo kutya ota dimbuluka eshi a li omukulunhu wovahongwa vakwao kutya okwa li e hole okutya ‘ouyuuki inau fimana ashike ngeenge haave we u pumbwa’.
Theofelus okwa indila Ovanamibia va tule oukuni kumwe okuyandja ouyelele aushe okukwafela opolifi moshiningwanima eshi.
Oshiningwanima eshi otashi adjakanekwa komalungula, Ovanamibia keembinga neembinga otava pula oushili, ouyuuki, nomapekaapeko opombada moshiningwanima eshi.
Sha landula eshi ovakwanedimo vaMassdorp va tula mo oshibofa shomunhu a kana eshi ina aluka kofikola, opolifi oya li ya ninga okashoko pamwe novakwashiwana nokulitwa Massdorp koshi yonhopa.
Olopota yotete oya li ya holola kutya Massdorp okwa xulifa eshi a wila momeva ashike eshi kwa ka ningwa omakonaakono a wedwa po, okwa didilikwa kutya Massdorp okwa kwatwa keenghono, ta dipawa nokuekelwa koshi yonhopa.
Omupopiliko wopolifi, Deputy Commissioner Kauna Shikwambi okwa holola kutya opolifi otai twikile nokuninga omapekapeko moshiningwanima eshi.
Minista okwa holola yo kutya epangelo ola kundana onghundana ei notali yandje omahekeleko kovakwanedimo vaMassdorp.
-wakudumoauleria@gamila.com