SIBBINDA – Richwell Mazumo uiketezi kusebelisa zibo ya hae ya njimo kukala pisinisi ya kulima miloho ni miselo. Kutulo yahae uilekisa kwa sicaba mwa Sibbinda mwa sikiliti sa Zambezi. Ulumela kuli mazazi akuitinga kubabañwi afelile, mi nasupa kwa timana mwa Bibele: “Bokukwaluna neba ca maana mwa lihalaupa… Mulimu nabafa buhobe bwa kuca kuzwelela kwa lihalimu.”

“Nako ya Mushe ifelile maisilaele habafumana maana kuzwelela kwa lihalimu mwa lihalaupa. Nako yeo ifelile. Lusike lwa libelela mubuso kulufa lika kaufela. Luna ni ngana, luna ni mubu onunile, kacwalo lusebeze kuli lupile,” nabulezi, ayemi fahala simu yahae. Nakalile njimo yahae kasilimo sa 2022 famubu wahekele iliñwi. Niha talimana ni butata bobutaha mutu haitenga mwa bulimi, uzuha kamapakela ka 03h00 kubeleka famubu wahae pili asikaya kale kwa musebezi wahae wabuticele. 

Hayo caisa kwa musebezi uzwelapili kubeleka ni lubasi lwa hae kulatelela lizwalo lane asiyezwi ki nyandi ndatahe. Mazumo ucala matomato, green pepper, sipinachi, kabici, karoti, bitiruti, mango ni ngulu. Satusa sicaba mwa silalanda kuimulula kwa misipili yakuya kwa Katima Mulilo, libima ze mashumi asilezi. “Kufukuza tifo ya linzila kwa sicaba, ni cala ni kulekisa miloho fateko ye cipile,” nabulezi.

Sipinachi uilekisa fa N$5 ni N$10, kuitinga feela fa butuna bwa matali. Mazumo hape uitengile mwa bulimi bwa limunanu, mi hape ulima lico ze cwale ka mabele, mbonyi, mauza, mindalangwe, mahapu ni ngulu kabuñata. Nihakuna ni linanga ufumananga kutulo yende bakeñisa tundamo yahae. “Buñata haba katazeha, neni konile kukutula mikotana yesupile ya mauza ni mikotana ye mine ya mabele. Kulikani kuna mwa silimo sene sili sesi tata,” nabulezi.

Sina balimi babañwi babalima famubu olikani, utalimana ni butata, sihulu kutokwa mezi. Kono nihakulicwalo naikopanyize ni sicaba kuli anoka mezi mwa siliba sesi sebelisa mulilo wamagesi. Bakeñisa kuli hana mipila yetokwahala yaku selaelisa usebelisa mahele mi kikalibaka leo uzuha kamapakela kukala kuselaela pili asika liba kwa musebezi. Nakupile babakona kutusa kumulekela lisebeliso za njimo, sihulu tanka ya mezi ni waya ya lukwakwa, sina likomu halibonahala kumukataza.

“Likomu kamita za fita, mi ni saba kuli likaswana zasinya simunyana yaka kakuli libona miloho yemitala. Hanifumana tanka ya mezi ni waya ya lukwakwa simu yaka ikaba mwa silelezo,” nabulezi. Kuekeza usana ni sepo ya kutusiwa kuiyepela siliba sa hae, ili kuli ayandulule simu yahae nikutusa kulwanisa tala. Ususueza babanca kusa ina feela, kono kuitenga mwa bulimi kufita kulibelela tuso ya mubuso.