Auleria Wakudumo
Oshitufi sheengalo, omangeshefelo nokuulika ounghulungu woohandimwe osho yo omifyuululwakalo nedina la shiivika nawa ‘Oniipa Kalawa Fresh’ otashi ka kala ko noneudo momafiku 18 fiyo 21 Desemba modoolopa yaNiipa.
Kalawa Fresh Festival neudo okwa kongolola ovashikingalo aveshe keembinga daNamibia, ovaimbi vanini naavo va ikilila nale embako.
Neudo, Gazza, Manxebe, Ama- Daz- Floor, Daymenment, Dj Erik the Dj, Dama Monique, Ice Crystals, Dj Kajozi naDj Erro navakwao va wedwa po ovo veli kembako, hano tava ka mwenyeka nokundjangeka oshitufi eshi.
Eshi oshi li oshikando shititano oshitufi sholudi la tya ngaha tashi ningwa mOniipa. Neudo, otashi dimbulukwa koshi yoshipalanyole’okukwatakaneka Namibia’.
Umwe womovaunganeki vOniipa Kalawa Fresh Festival, Pinehas Shikulo okwa holola kutya oshitufi otashi ka kala sha denga eembwa noiyaxa neudo.
“Neudo otwa kwatela mo ounghulungu wOvanamibia, omangeshefelo noukumwe pokati komapupi noitukulwa aishe yoshilongo,”Shikulo ta holola ngaho.
Kalawa Fresh Festival okwa li a nana Ovanamibia 17 000 momudo 2018. Shikulo okwa ti oshe va twa omukumo kutya noneudo otashi ka enda nawa.
Kakele keengalo noshimwenyo, oshitufi otashi yandje yoo omhito kovanangeshefa vopomudingonoko okukala va ngeshefa oilandifomwa yavo, oshoyo okuyandja oilonga yopokafimbo kovakwashiwana.
Neudo, ovanangeshefa vanini veli 30 otava ka kufa ombinga momaulikilo oipindi mOniipa Kalawa Fresh Festival.
Ovaunganeki otava ifana oohandimwe, ovanangeshefa nakeshe oo ena ehalo lokukwafela oshitufi eshi opo a kwatafane navo opo va longele kumwe.
Oohembudangele otava ka futa oN$20 poshivelo omanga ovakulunhu tava ka futa oN$40. Efiku lepatululo loshitufi, mo 18 Decemba otaku ka kala ashike manga ooDj tava mwenyeke nokutambula ko aveshe ovo tava fiki. Mo 19 nomo 20 omu ovashikingalo otava ka mwenyeka oshitufi nefiku la xuuninwa, ovanhu otave keli kufa ashike eengonyoto momaulu nokulekelafana.