WINDHOEK-Mbunga zakarerapo vamitili zedina Teachers Union of Namibia, kazigeve matjiliso koministry zerongo kuhamena varongwa ava vana kara moUkraine nsene asi koyili nayivahorokera, ava vana kara asi simpe moveli momukaro gomudona guna kara moUkraine ntani Crimea peninsula.
TUN katente asi ministry kwatulisapo elizuvho novarongwa ava, asi ngavafuta yimaliva yokutengura ano vamwe kapi vana kara noyimaliva yangesi.
Presidente gwazo Mahongora Kavihuha katente asi epangero kuna turapo asi varongwa ava akare asi kwagwana yimaliva mepangero ndi asi pamakongo ndi konombunga dokulikarera vahepa kufuta yimaliva eyi epangero lina kuvafuta vatengure morwa mukaro dona guna kara mosirongo sina.
Mukaro moUkraine kunakara mukaro gomudona unene moomu tupu agukara nkenye mukaro dona. Morwa sinke varongwa ava lyafutilire epangero navafutira yimaliva eyi?
Varongwa vamwe vananyoka kutengura morwa kapi vana kara noyimaliva yokuvhura kuyafuta epangero.
Morwa sinke ministera Dr David Namwandi,ana kutantera asi vahepa kufurta yimaliva eyi? Varongwa ava vana kara asi kapi vana kutengura kuna kutjira morwa kapi vana kara nosimaliva sokuyafuta.
Nsene asi vanona ava navarema ndi vafe morwa mukaro guna kara moUkraine TUN ngazitaparara ministry zerongo yimo vana kutanta ngoso.
Ano Namwandi age asi TUN kuna hara tupu kureta epiyagano.Mbunga ezi kapi zakarerapo varongwa. Namwandi katente asi ministry kunakuvatera vanona ava morwa mukarodona guna kara moUkraine.
Eyi kuna kara yopa ngenderera. Ose kwavatentera asi nkenye murongwa ana hara kutengura gahepa kutengura ngesi.
Nokugava efatururo asi mbunga nye ezi zakarerapo ministry Namibia Students Financial Assistantance Fund, Hilya Nghiwete, kwatente asi kwato murongwa ngafuta yimaliva yongandi ntudi dogoro paapa ngavamana malirongo gawo.
Ose kapi twagwana komukarelipo gwetu moRussia asi kweli murongwa ana kara asi kapi ana kuwiza morwa tavayafutu yimaliva oyo. Ose eyi tuna diva kuna kara tupu asi koveli varongwa vana kutanta asi konomukunda edi vana kara kapi kuna kara yita, yipo nye asi aw okapi vana kuyimona asi nawo ngano vawize koNamibia. Yimo ana kutanta.
Age katente asi varongwa navenye vakulirongera moUkraine kwavatantera vatengure akare asi kupi gagwana yimaliva yendi.
Nghiwete katente asi wokusika ko 175 nare kavayasikire moNamibia kwedi kuna piko ano mowo kunakaramo vamwe ava alipilire kufutira epangero. Ano wokusika ko340 awo kuvafutira NASFAF, yimo ana kutanta Nghiwete.
Ano ava 60 awo moCrimea, kapi una vagumu udigu ou, ano ava 280 kuna vape asi vahepa kutengura mowo 178 yiwo vaya sika nare.
“Ose kuna kuyimona asi epangero talikaruganesa nomoliyuna N$ 5 dokufutira notiketa dawo vatengure. Ndando zotiketa zimwe zokuwiza tupu kutunda koUkraine kunakupura N$13 800.