Uuministeli wUukakwashikekookantu owa gandja olukalwa kaakalimo ye li 722 koKalkrand sho omagumbo gawo ga yi kohi yomeya omolwomvula onene ya loko mOmaandaha goshiwike shika.
Kalkrand omukunda gu li pokati koRehoboth noMariental moshitopolwa shaHardap.
Omeya gomvula otaga lopotwa taga hanagula moshilongo ashihe, unene kiitopolwa hoka ihaaku yelulwa shito.
Omeya oga hanagula po oopate noontopa, omapya osho wo omagumbo moshilongo.
MoKalkrand omwa lopotwa opate onene yo-B1 ndjoka ya pita mondoolopa ya yonagulwa nosho wo ondjila yeshina lyokolutenda ya hokwa komeya. Oongeshefa dhimwe, mwa kwatelwa ndhoka hadhi yakula aatelelipo nadho odha yelulwa, naantu mboka ya li mo oya tauka mo.
Omuprimaminista omupe Elijah Ngurare, esiku lyotango kwa ningwa omutumba gwopashigwana gotango okwa popi nkene epangelo tali yambidhidha aakalimo mondoolopa moka.
Ta ti, omvula ndjoka onene ya loko koKalkrand oya yi sigo omomagumbo ya hanagula omatungo nokupatitha oosikola.
“Ombelewa yOmuprima noombelewa oonene dhopashitopolwa dhoHardap odhi imanga kumwe opo dhi gandje omayambidhidho gomeendelelo,” ta popi ngaaka.
Ta ti, okwa ndhindhilikwa aakalimo ye li 722 ya tembudhwa, ya falwa hoka kwa londa, nuunene okwa ndhindhilikwa kutya olukanda Five Dollar olwo lwa ponokelwa komeya unene.
Ngurare okwa popi kutya oongeshefa odha pata, oongodhi dholusheno odha tokoka osho wo omatungo ogendji oga gwa po.
“Otwa tokola kutya aakalimo mboka ya tembudhwa, otaya kala taya topolelwa iikulya uule woomwedhi ndatu komeho,” ta ti ngaaka. Ta ti, oshoka omeya nago oga kala ga pata omolwopaipi ya topa, NamWater oku li metifa oku yi longa.
Okwa gwedha po wo kutya uuministeli wuuhaku nawo owu li metifa okugandja omalongo ga pumbiwa kaakalimo ya tembudhwa.
Shika osha holoka ashike omasiku omashona sho aakalimo ye li 362 yomomukunda Otjihitwa koRuacana moshitopolwa shaMusati ya tembudhilwa kEtunda mehuliloshiwike, sho nayo omagumbo gawo ga yi kohi yomeya.
Omudhingoloko goRuacana nago inagu shiwikila efundja.
Iiwike ya zi ko Wavis Bay noWindhoek nayo oya li yi li kohi yomeya konima yomuloka omunene moondoolopa moka.
-vkaapanda@nepc.com.na