Rundu- Rudi rovaShambyu moKavango zoupumezuva kavatambwireko egano lyokutanta asi Uvhungu-vungu kuna kuza vakaliwayike nokutanta asi ngesi yina wapa, evango eli kwakara pomukunda gwaUvhungu-vungu upumezuva waRundu. Posiruwo oso nkuruministera Elijah Ngurare ntani ministera gonondima Inge Zaamwani kavayadingwi re kombara zaShambyu mosivike sakapita, muhuyungi Sebastian Kantema kakwatereremo rudi rwaShambyu kageve ruguwo rwawo morwa mavango goyikunino kapi gana wapa momukunda, unene ngwendi evango eli lyaUvhungu-vungu projeka zokukanda masini. 

Rudi rwaShambyu kuna kuhundira epangero asi vahepa kuruganesa evhu eli vavapa mawokowoko ndi valitengwideko kwavenyalyo. 

Awo kavatente asi eyi vagaverere evhu eli kwakere asi valiruganese moekuliko nye kapisi asi kulipungura tupu mawoko woko. Kantema konyima zokupurakena, asi hawe ngesi epangero kuna kumoneka asi tavaruganako Yuma mokuwapukurura projeka ezi zikatameke kurugana. 

Presidente Netumbo Nandi- Ndaitwah apa nye katulire mosirugana NDP6 katente asi evango lyokukandera kuna kuza vakaliwapukurure. 

‘’ Epangero ngesi kuna kara melikwamo lyokukawapukurura Uvhungu-vungu lyakara moKavango zoupumezuva. Kugusamo yitji ngesi vana tameke, yimo ana kutanta.’’ 

Kantema katente asi egano lyokuwapukurura Uvhungu-vungu kuna kara egano lyewa unene, morwa projeka ezi kuna kara nomarandesero gomawa. ‘’ Projeka ezi kapi ngazi kara asi vaKavango velike ngavagwanenamo mauwa nye Namibia navenye yimo ngavaparukira. 

Alyo ngali tulisapo yirugana ntani kuwapukurura ekonomi lyosirongio. Sirongo setu kugwana masini ponze, nayimwe ngoso ayitundu pevango lyangesi, nsene asi ngazitameka kurugana hawe uwa una wiza. 

Ngwendi yeyi namwene moIndia, vatungimo nawo kuranbdesa eyi vana kuzangura pevango olyo. Eyi yina kara asi kunma kukulika vatungimo. 

Owo nye vana kugwana mauwa aga tavakulike vekoro lyawo. Yimo ana kutanta. Kupitira momberewa zaKavango zoupumezuva, ngesi vadinkantu wokusika ko 180 kuna vape sirugana esi vazerese evango lyauvhungu-vungu rambangako pevango lyokukandera.