Auleria Wakudumo
Ounona vavali ovo va li va fadukwa po navo komukainhu oo kwa li ta longele meumbo lavo ova monika eshi va hangika inava djala poundingosho votombo molukanda laMbulu mOshakati Etitatu.
Otaku hokololwa okaana kamwe ke na odula imwe nakakwao oke na eedula nhatu. Okaana keedula nhatu okomunailonga womeumbo e ya nako omanga kodula imwe oko ke ya okulelwa komunailonga.
Ina yokaana aka kodula imwe, *Ndateelela Shimanda (kali shi edina laye loshili), okwa holola ta ti omunailonga okwa faduka po nounona Omaandaxa noveya ashike okumonika mEtivali lwopo 11h00.
“Omaandaxa eshi nda dja koilonga onda hanga eumbo lihe na ovanhu. Onda kala nokudenga ongodi ashike itai kufwa po. Eshi kwa toka onda ka nangala keumbo lakahewa kange,” Shimanda ta ti.
Shimhanda okwa shiivifila Kundana kutya paife oshikando shitine omunailonga waye ta kufa ounona meumbo, te va twala keekamba shaashi vati oha nu otombo. Kakele, shito ohe ya ngaho keumbo.
Ova twikila okukonga vati omunailonga Etitatu. Konima yokutula efano lomunailonga nomafano ounona vavali komalungula, ovakwashiwana ova kala tave mu dengele apa ve mu mona nounona.
“Nande ongaho, eshi ashike hatu fiki ponhele opo hatu lombwelwa, ohatu hange va dja po va ya konhele imwe. Otwa papala ashike Etitatu la fika inatu va mona,” Shimhanda ta ti.
Shimhanda okwa ti ka li ta dulu okushivifila opolifi shaashi omunailonga oku mu shi yee oku na okaana nomumwainamati.
Etitatu lwopo 11h00 okwa dengelwa ongodi kutya ova monika pondingosho votombo puMbulu moShakati.
“Otwa hanga va nangala pedu nounona inava djala sha. Onda haluka unene konghalo omo nda hanga ounona noku ka landa oidjalomwa moPep. Okaana kange shaashi ohaka nyamu natango, onda hanga ka pewa oshifima nomaungu a pewa poundingosho,” Shimanda ta ti. Shimhanda okwa weda po ta ti okwa twala ounona koshipangelo meendelelo opo va ka konaakonwe nokumona epango lopaunamiti nomanyamukulo aeshe okuli nawa nonande oundjona vaKalunga vali ve kwatwa koutalala nokodjala.
Shimhanda ota kumaida ovadali va twale ounona keekinda ponhele yokukuta omunailonga womeumbo shaashi vamwe ihaveli nekelwa.
“Luhapu ohatu eta ovanhu ava tushi nomaumbo opo ngeno u henuke omunhu uhemushi omikalo daye kutya odi li ngahelipi ashike navo ohave ya okutulungela oinima ii,” Shimhanda ta ti.
Nonande Shimhanda a lekela omunailonga waye, okwa ti oshiningwanima oshemu kumwifa na ita dulu vali okufiya okaana kaye meke lomunailonga. Okwa ti oshixwepo okutwala okaana kofikola ile kokakinda konhumba, yee te ke ka tala ko ngeenge a dimbuka.