Auleria Wakudumo 

Moshikandjohoololo Epembe moshitukulwa shaHangwena omwa holoka ehafo linene eshi ovakwashiwana va pewa eemboola domeva nhee odo tadi kala tadi longifwa komikunda di dule po23. 

Omuprima woshilongo Elijah Ngurare oye a patulula pambelewa nokuyandja eemboola edi kovakwashiwana vomoshikandjohoololo Epembe Etitano.  Eemboola oda tungwa momikunda ngaashi Oshipya, Onamundidi, Onesi nEeshi. 

Omupopiliko wombelewa yomuprima Maxmus Halwoodi okwa holola kutya eemboola otadi ka longifwa komikunda di dule po23 opo ku kandulwe po enota nokukwashilipaleka kutya ovakwashiwana otava longifa omeva a yela. 

“Omboola yomomukunda Oshipya otai kala yo tai longifwa kovanamukunda vomOhameya, Ohenghono, Omupanda wotete nOmupanda mutivali omanga Onamundidi tai kala nokulongifa omboola yavo nOnangolo, Ohaimbudu, Ohakafiyona, osho yo Oukala,” Halwoodi ta ti. 

Onesi otai longifa omboola nOhafino Yomainda, Olungu North, Okadidikashona, Oshimangwa nOkamangwena. Eeshi otadi longifa omboola nOmhito yEkombo, Oshamono, Mipapa, Omayi nOshanyata.  

Omuprima okwa holola kutya epangelo otali twikile okuwanifa po omaudaneko alo oo la ningila oshiwana.  “Oshi li oshikando shitihetatu paife, epangelo tali wanifa po omaudaneko alo oo kwa li la udaneka pefimbo lomahoololo,” Omuprima ta ti. 

Ngurare okwa twa ovakwashiwana unene ovanyasha omukumo opo va longife eemboola domeva odo va pewa okuninga oukunino momaumbo avo opo ve limonene mo oipalwifa nokulwifa oshikukuta. 

“Exumokomesho otali ti kutya ovanhu aveshe, mwa kwatelwa ava ve li komikunda nava kale ve na eemhumbwe davo defiku keshe da wanifwa po ngaashi ovo veli meedoolopa. Eemhumbwe defiku keshe omwa kwatela omeva, eepate, naikwao imwe,” Ngurare ta holola. 

Omuprima okwa weda po yo kutya elalakano lepangelo olomalelo opaitukulwa osho yo opaudoolopa nomikunda di kale hadi dulu okulonga oikulya yavo vene. 

Okwa ti epangelo ola hala ovakwashiwana tava longo oikulya yavo vene loo tali lande yoshikukuta kovakwashiwana.  -wakudumoauleri@gmail.com