Auleria Wakudumo
Ouministeli wouhaku nonghalonawa owa pewa oilongifo yopauhaku i fike pongushu yeemiliona N$28 okudja kepangelo laAmerica.
Oilongifo ya yandjwa kepangelo laAmerica omwa kwatelwa eelaptop, eeprinta, oradio yomudidimbe, oilongifo yonetwork, UPS systems, naikwao ya wedwa po.
Omupopiliko wouministeli wouhaku Walters Kamaya okwa holola kutya ouministeli onghene tau twikile okukonga omakwafo penya naapenya osho yo okuninga eenghendabala da yooloka opo u nghonopaleke eyandjo louhaku moshilongo.
“Okudja eedula da ka dilongela, ouministeli owa kala nokunghonopaleka ouhaku moshilongo nokukwashilipaleka kutya owa mona oikwa noipangifo ya wana okuyandja epango longushu kovakwashiwana,” Kamaya ta ti.
Okwa holola kutya eshi osha kwatela mo oilongifo okudja monhele yokuyandja omiti, oilongifi yopashinanena, meenhele dokulideulila ile moshipangelo shoovene.
Kamaya okwa ti eyandjo loilongifo ei otali holola elongelokumwe olo Namibia e na noilongo imwe okuyambulapo ouhaku wovakwashiwana moshilongo.
“Eshi sha yandjwa kashi fi ashike oilongifo, oipundi noitaafula ashike etwomukumo kovanambelewa vouhaku kutya otava dulu okulonga oilonga yavo, inava indikwa koilongifo moshipangelo. Otashi holola yo kutya ovanaudu ova mona ouhaku wa wana,” Kamaya ta ti.
Ouministeli owa holola olupandu kepangelo laAmerica eshi a yandja ekwafo olo la li la pumbiwa unene.
“Ekwafo eli otali holola elongelokumwe olo la fimana mokuhanga omalalakano oilongo aishe nexumokomesho,” ta holola.