Auleria Wakudumo 

Ouministeli wounamapya nounaimuna, omeva, eeshi netalululo ledu melongelo kumwe nelelo lodoolopa yaUtapi ola yandja oumwene wedu kovakalimo ve dule po184 molukanda Onhimbu nOukwa-Wananyanga. 

Omadu oo a yandjwa oku li oshitukulwa shomadu oo a li koshi youministeli wounamapya nohaa yandjwa komalelo eedoolopa nokoshiwana shopomungonoko. 

Eshi otashi ti kutya ovakalimo ve dule po184 ova pewa oufemba womaumbo avo omo vamwe va kala okudja mo2000 no2005, vali mo vehena oumwene womaumbo oo. Ovakalimo paife otava dulu okutunga nokuyambula po omatungo avo. 

Oumwene wedu ou owa yandjwa koshi yaasho hashi ifanwa oFlexible Land Tenure System. 

Umwe womovakalimo, Tuyenikelao Paulus weedula 55 okwa holola kutya okweya ponhele mo2000 manga ashike pena omaumbo 17. 

“Ka ndali handi tula omofi momesho, handi li pula alushe kutya onaini handi ka mona onhele yange ili kedina lange. Otwa ninga omaindilo oumwene womaumbo etu oule wefimbo nokuli ufa komalombwelo okudja kouministeli wounamapya oshoyo elelo lodoolopa yaUtapi,” Paulus ta ti. 

Paulus okwa holola yo kutya ova kala va mangwa okulonga oilonga imwe ile unene okuninga omaindilo onhumba ooh aa pula ombaapila yeumbo. 

Omukulunhuwiliki mouministeli wounamapya, Ndiyapuki Nghituwamata okwa yandja omafoloko kelelo lodoolopa yaUtapi eshi la yandja oumwene womaumbo kovakalimo vavo. 

“Okuyandja omaumbo oo eli komadina ovakwashiwana otashi xumifa komesho oodoolopa. Ovakalimo ohava kala va manguluka okutunga ile okuninga omalunduluko onhumba,” Nghituwamata ta holola. 

Nghituwamata okwa holola yo kutya Outapi owa waimina omalelo eedoolopa eli ashike atatu moshilongo oo eshi pondola okuyandja omaumbo ile edu lili Komadina ovakalimo vavo. 

Omukulunhuwiliki welelo lodoolopa yaUtapi Mateus Ananias okwa holola kutya Outapi owa katuka onghatu ei okukwatela mo ovakalimo vavo ovo veli momalukanda. Okwa ti ovakalimo ohava kala vena elineekelo nomukumo melelo lodoolopa yavo ngeenge tava pewa omayakulo oludi eli. Ananias okwa ti elelo lodoolopa itali yandje ashike oumwene womaumbo kovakwashiwana ashike otali ningi yo eendjodi davahapu oshili, nokupalela onakudiwa yavo elila liwa. 

Molukanda Onhimbu moExtension 5, omwa li mwa tungwa oungudu vomaumbo vavali. Ongudu yotete oyali Tulongeni Association, ina omaumbo 69 mwa kwatelwa eeplota 58, omapandaanda ahetatu nonhele yayeuluka imwe. 

Mateus okwa ti onhele ei oya wapekwa nokufiilwa oshisho kelelo lodoolopa laUtapi. Onhele itivali molukanda omu, Namakalu Associationoinaomaumbo70, mwa kwatelwa eeplota dili 67, nenhele dokufuda po dovakwashiwana dili mbal. Nayo oyili koshi yefiilo shisho lelelo lodoolopa yaUtapi. 

Olukanda likwao, Oukwa- Wananyanganaoouna omalukanda vali. 

“Olukanda lotete, Tutungeni Association olina omaumbo 29, mwa kwatelwa eeplota 28 nonhele yovakwashiwna imwe. Tutungeni keli koshi yefiiloshisho lodoolopa yaUtapi,” Ananias ta ti. 

Omanga ikwao, Petrus Kalipi ina omaumbo 33, mwa kwatelwa eeplota 30, oplota imwe yoshiputudilo shopombada neenhele dovakwashiwana dokufuda po dili mbali. 

-wakudumoauleria@gmail.com