Auleria Wakudumo 

Minista wounamapya nounaimuna, eeshi, omeva nomatalululo omadu Inge Zaamwani pamwe nomupedu waye Ruthy Masake ova talela po eeproyeka depangelo doikulya da yooloka moshitukulwa shaZambezi. 

Minista okwa holola kutya etalelepo laye ola nuninwa okuyandja ekwafo keeproyeka odo da totwa onhomenawina kepangelo moshitukulwa shaZambezi nokutala nghene tadi shi endifa. 

Eeproyeka da talelwa po ongaashi oLiselo Horticulture Gardens osho yo Chefuzwe Poultry Value Chain Beneficiary. 

Eeproyeka odi li koshi yoprograma youministeli wounamapya nounaimuna tau ifanwa oValue Chain. 

Oda nuninwa okuxwepopaleka elongifo loshimaliwa shihapu, osho hashi longifwa kovanamapya ngeenge tava tutu oilandifomwa yavo osho yo okuninga omangeshefelo keenhele di lili nodi lili. 

Zaamwani okwa holola yo kutya epangelo ola katuka yo onghatu ei opo li yambule po ounamapya moshitukulwa shaZambezi noku va twa omukumo opo va kale tava kufa ombinga. 

Liselo Horticulture Gardens ohai longo oikulya ngaashi omapungu, omabanana, eenyanga, omanyoto naikwao ya wedwa po. Omanga Chefuzwe hai tekula eexuxwa nokulandifa omayi. Eeproyeka adishe da talelwa po kuminista otadi ulike nale oidjemo ishambula. 

Omupeduminista mouministeli nounamapya nounaimuna Ruthy Masake okwa holola kutya epangelo otali twikile okuyandja omakwafo kovanangeshefa vanini ngaashi ovo va talela po. 

Masake okwa holola yo kutya ouministeli owa didilika omashongo oo a taalelwa kovanamapya ngaashi oupuka osho yo omeva oikunomwa yavo. 

-wakudumoauleria@gmail.com