Auleria Wakudumo
Omupopiliko wongudu yoIndependence Patriots for Change (IPC) Immanuel Nashinge okwa koleka kutya oilyo ihamano ikulu yongudu yo-IPC oya tula mo eindilo lokufiya po ongudu.
Nashinge okwa ti eshi oshi li oufemba wavo okufiya po ongudu oyo inava hala vali nokuwaimina eeengudu dikwao ngeenge ove na ehalo loku shi ninga.
“Keshe umwe oku na oufemba wokuhoolola ongudu oyo a hala nongeenge okwa mono kutya okwa hala okufiya po ongudu yonhumba, nena natango oku na oufemba wokufiya po ongudu oyo,” Nashinge ta ti.
Mwaavo va fiya po ongudu yo-IPC omwa kwatelwa omupedukulunhuwiliki wongudu yo-IPC Patrick Kashera, omunashipundi wongudu yo-IPC mosh itukulwa shaKavango East Ricahrd Shindimba, omupedunashipundi woKavango East Shiyave Mwengere, omukalelipo woomeme woshitukulwa shaKavango East Shimona Sandrina, oilyo ivali yongudu, Kaveto Ambrosius naMuremwa Athanasius.
Otaku hokololwa oilyo ihamano ya fiya po ongudu yo-IPC shaashi vati inava hafela omusholondodo womadina aavo va ya komutumba wopashiwana.
Momukanda wa shangelwa omukulunhuwiliki wongudu yo-IPC, Christine !Aochamus okwa ti oilyo ya fiya po ongudu oya holola kutya ove udite omusholondodo womadina inau kwatela mo oilyo yokoshitukulwa shaKavango East.
Etokolo lavo vati ole likwatelela keemhumbwe dovanhu vomoshitopolwa shaKavango East odo ve wete itadi tulwa komesho mongudu yavo kwa li.
Momusholondodo womadina oilyo yo- IPC o20 ya ya komutumba wopashiwana omu na ashike oshilyo shimwe sha dja koshitukulwa shaKavango East, Tepalo Markus.
Omanga omusholondodo aushe ou u na oilyo 96 mwa dja oilyo omuwoi okudja koshitukulwa shaKavango East.
Moilyo ihamano ei ya fiya po ongudu yo- IPC koshitukulwa shaKavango East omu na ashike omupedukulunhiwiliki Kashera e li ponomola 74.
Oilyo yongudu oya weda po kutya ongudu yo-IPC oya ninga po ongudu yokupopya omaupote, mu na ovanhu ve li vakwao koshi nelelo lavo ohali mbadapaleke nokutilifa vakwao.
Eshi a pulwa kuKundana kombinga yoshinima eshi, Nashinge okwa holola kutya ke na eshiivo kombinga yaashi tashi popiwa kwaavo va fiya po ongudu.
Nashinge okwa ti ove na omulandu hau landulwa mongudu yavo ngeenge tashi ya kokuhoolola omadina okuya komutumba wopashiwana.
“Kandi na eshiivo kombinga yaasho ashike ngeenge oinima yomudo wa ya katu na nayo shaashi otu li momudo upe. Oinima yo2024 nai efwe ndele hatu kwatele komesho yomudo mupe,”Nashinge ta ti.
Nashinge okwa yelifa kutya oilyo oyo oya fiya po nale ongudu yo-IPC molwomatomenho avo, onghene otava fimaneke oilonga oyo va longela ongudu eshi kwa li oilyo.
“Ohatu va pandula eshi va kala nokulonga noudiinini okufikamekapo nokuxumifa ongudu yo-IPC. Ohatu va halele yo omayambeko monakuiwa,” Nashinghe ta ti.
-wakudumoauleria@gmail.com