Auleria Wakudumo
Nkurenkuru – Omupopiliko wopolifi, Omupedu Komufala Kauna Shikwambi okwa ti moule woshivike ovanhu vahapu ova ningwa oihakanwa yelimangeleko moshilongo ashishe.
Umwe womovanhu ovo omulumenhu weedula 21 oo e li kufa omwenyo eshi eli mangelekela nomwiya wonghaku momuti. Oshiningwanima osha ningwa komukunda Mayara, Nkurenkuru. Nakufya okwa tongolwa kutya oye Thams Mapeu Ngoma.
Oshiningwanima shikwao, omulumenhu weedula 23 naye okwe li mangeleka mongalashe, meumbo lavo li li molukanda ledina Veddersdal mOkahandja. Nakufya oye Davern-lee Willbert Van der Westuizen otaku ti okweli kufa omwenyo ningilwa.
Natango momukunda Okangeke mOnandjaba, omukulukadi wedina Hilta Peneyambeko Paulus okwa xulifa eshi eli mangeleka noshikaiwa monduda yaye yoku nangala. Ina fiya po etumwalaka lefyo tali yandje ouyelele kutya okwe li kufila shike omwenyo novakwanedimo vaye ova shiivifilwa nale.
Oshiningwanima shafaafana naasho osha ningwa molukanda Oshivelo Northern pOshivelo eshi omulumenhu weedula 40 eli elimangeleka nongodi. Nakufya ou naye ina fiyapo etumwalaka lefyo novakwapata
vaye ova shiivifilwa. Nakufya okwa tongolwa oye Noa Erastus Tala.
MOkombahe, Jefta Haoseb weedula 34 naye okwe li kufa omwenyo eshi eli mangeleka. Oshiningwanima osha ningwilwa momukunda Okombahe. Shikwambi okwa ti nakufya okwa kala ta ningi nale omatilifo kutya ote li kufa omwenyo.
MOhangwena, omulumenhu weedula 28 okwe li mangeleka nongodi ei kumbika meembuli donduda. Opolifi oyati Joba Kavela okwe li kufa omwenyo po08h00 mEtitano. Oshiningwanima osha ningilwa momukunda Engela moshitukulwa shaHangwena.
Oshiningwanima sha yooloka osha kwatelamo efyo eshi vati omukainhu a dengwa fiyo omefyo kukaume kaye kopaihole.
Nakufya okwa tongolwa oye Sililo Nicollet Ntelamo, weedula 40. Olutu laye oleli tuwa pombete.
Shikwambi okwati vati manga itaku toka, Ntelamo okwa monika ta dengwa neengonyo nokutewatewa momudingililo weumbo alishe komulumenhu waye.
Oshiningwanima osha ningilwa kolukanda loCowboy, moKatima Mulilo, sha ningwa po 22h00 moEtitano.
-wakudumoauleria@gmail.com