OSHAKATI – Omulukunhu koshitaashi shopolifi mOshakati Chief Inspector Immanuel Iilonga okwa ti ovakayulinyanga vamwe ova panda okukala konima yekumba molweendya, omeva nolusheno loshali.
Pefimbo Kundana a talela po odolongo yaShakati Etivali, Iilonga okwa hokolola ta ti paife odolongo oi hadi shaashi ovanhu vamwe ova panda okukala tava li oikulya yoshali omanga vamwe ove na oinghundi woshimaliwa shokulifutila mo.
Okwa yelifa ta ti eepelesenda 70 daavo ve li modolongo yaShakati ova pewa elifutilemo komhangu, ashike vahapu otave lipopile kutya kave na oshimaliwa shokulifutila mo.
Okwa ti moshitaashi shopolifi mOshakati omu na ovatamanekwa vovalumenhu 224, naashi osha eta opo va nangale meenduda va finana mo. “Otwa didilika unene ovatamanekwa ve li peedula dounyasha va dja komalukanda mOshakati va panda okukala modolongo shaashi ove udite kutya onghalamwenyo yavo oi li xwepo mokufaafanifa nokushuna komaumbo,” ta ti. Iilonga okwa ti ovatamanekwa vamwe ova panda eshi ve li modolongo okukala tava nyekeko eembelela davakwao ngeenge tava etelwa oikulya. “Ovatamanekwa ovo vape okutambulilwa modolongo ovo unene hava kala moupyakadi wokunyekwa ombelela kuvakwao,” ta ti.
Iilonga okwa popya natango ta ti ovatamanekwa ove lininga oikengelela ngeenge ve li modolongo omo hava kala tava longifa eengodi ndele tava tula ovanhu mokatoo. Okwa ti ovanhu ve li kondje ova ninga oihakanwa okukanifa oshimaliwa shavo tashi pitile pamukalo wokukengelelwa kovatamanekwa ve li meedolongo.
“Ngeenge owa i meedolongo oto hange mo ovanadolongo ile ovatamanekwa tava longifa eengodi okutula oinima komapandja oFacebook tava ti kutya otava landifa eetuwa nosho tuu,” ta ti.
Iilonga okwa ti ovanhu ohava pulwa opo va tumine ovatamanekwa oshimaliwa nokonima ohava ka didilika kutya mboli ova kengelelwa oshimaliwa shaye.
Okwa popya natango kombinga yovatamanekwa have lihumbatele nai ovapolifi eshi ovanambelewa va ninga oihakanwa yokudengwa, nokutukwa.
Okwa weda po ta ti ovapolifi ohava tilwa omaxu kovatamanekwa ngeenge tava i keenduda davo va ka tule po elandulafano.
“Kashipu okulonga novatamanekwa molwaashi vamwe ohava kwatwa komhepo yokuponokela ovapolifi,” ta ti.
Ovatamanekwa vamwe ova koleka tava ti oshoshili ova taalela eshongo loshimaliwa shokulifutila mo mokakuma omanga vamwe ove udite kutya modolongo omu li xwepo okufaafanifa nonghalo yokushuna komaumbo. Omutamanekwa weedula 32 a dile kolukanda Oshoopala mOshakati okwa ti onghalamwenyo yaye oya lunduluka paife eshi e li modolongo. “Ngeenge onda shuna keumbo natango ohandi ka kwatwa komhepo yokulonga oimbuluma molwaashi kandi na oilonga,” ta ti.