Auleria Wakudumo
Ministera gweyi yomonda zosirongo Albert Kawana katulirepo veta zina kutanta asi, nsene navazipulisira, asi nsene komeho oko ndokotora takasiga evango lina vana kupura asi yinke yina li muntu ogo vapire kutjangapo, hawe ngamona deedi galire mbwindi momuduva. Age katulipo noveta zokutjanga vanamvharerwa ntani kuvapa yididiliko rwauvali momandaha.
Kawana pwanare kwayagusirepo veta ozo pelikwamo morwa vakwawo womombongarero kwazinyokere. Kawana katente asi hawe veta ezi ngesi kuna kara nye asi kuna kukagusapo maudigu nagenye gana karapo yipo asi vandokotora vahepa kutjanga monzapo zonomfa asi yinke yina li muntu ogo makura awo vahepa kuyirugana monaruwa moomu vayilirongera pwahana kukara matonganeso nkenye.
Age katente asi eyi yina kara mulyo unene, mukutwara ekuliko komeho. Vandokotora kapisi vatjire hena kuturapo asi yinke yina li muntu ogo. ‘’ Yahepa kuliza moomu avarugana nonzapo dononkwara ntani nedi donomfa dahepa kukara ngoso,yimo nye zina kara veta novandokotora vahepa nye kuyitjanga ngoso mombapira ezi ava tura madina govafe. Nsene kapi ana kuyirugana oyo gahepa kugwana matengeko kukwama veta ezi. Katameko tupu lyomvhura ezi, vadivi uhaku ntani ministeli zoukanguki kapi vageve nzapo zina kutanta asi yinke yalire vanona gona ava vakere asi kwazumbanesere nomwenyo dawo morwa kwavagazarere asi kuna li nondja douhungu pomukunda Livayi moKavango zoupumezuva. Kawana kagwedereko asi veta ezi kuna kugava nye nawa nawa asi yilye ana kutjanga mufe ogu, ntani yilye ana kugava asi kupi vana kutwara mufe ogu eyi nayigusapo nye nomutangu asi valirange kukahoreka.
Veta simpe ngazigusapo eyi yakarapo nare kuhamena nonzapo zonomfa. Siruwo nasinye, nonsigwe vahavasilika hena kugwana nombapira dovafe kurona vawoyipo asi vakagwane eyi yavatumbukira nsene vana fisa vakurona vawo asi yawo. Twahepa kuyididilika nawa nawa asi mulyo unene kukara nombapira zonomfa nye kapi yina kutanta asi nayinye yina pumbwa koge toyigwana. Mbapira zonomfa kuna kutanta nawa nawa asi yinke yina li muntu ogo ntani yinke yina muli. Nye kapi yapulisira asi muntu agwane nombapira mbapira donomfa mosimpu simwe tupu makura vahepa kuzigava kukwama nye veta ezi tuna kukaturapo ngesi. Yimo ana kugwedako ngoso. Pwantani ngesi ministeli kuna kugava tupu mbapira zokunkondopeka nokutanta asi muntu gwangesi anadogoroka.
‘’ Ose kapi atugava nombapira dounzapo asi muntu ogu ana dogoroka. Kuna kureta udigu ntani kuna kukulika widi, morwa mbapira ozo ava tjanga kapi zina kara nedidiliko lyewa nkenye ogu kuvhura aninkeko zendi zina kara asi kapisi zousili. Veta ezi tazikagusapo maudigu nagenye aga,’’ ministera yimo nye ngoso ana kutanta nokugava ehuguvaro kovatungimo. -wakaudumoauleria@gmail.com