Ngonga- Momukunda gwakara momukunda gokoure, gwakara momukunda horowero gwaJudea Lyamboloma moZambezi, nzira ezi zakara avagendi vanona vaze kosure kuna kara nzira nye zina kutjilisa vantu morwa yikasama eyi ndi asi magima aga gana kara monzira ozo.
Omu vana kugwana nkenye ezuva yikasama eyi unene vanyime, vamfuu,vangandu nayimwe ngosoyakara asi kureta siponga kovantu, eyi yina kara ngesi asi vantu kuna kugenda nowoma, ntani kuna kutwaredera nye vanona vafaure kosure yina kutwaredera erongo lipire kugendapo nawa. Cecilia Kompeli, mukurona sure gosure Ngonga, kahuyungire momunene morwa mukaro nye ogu gomudona guna gumu vanona vendi woposure. ‘’ Mokuhuyunga usili, vanona vetu kuna kara meparu lyosiponga unene. Awo kuna kugenda sinano sosire, omu vana kupita mavango gomadona unene, opo yina kara yikasama eyi, unene opo nye ayipitire. ‘’ Erongo nokuronga kuna kuyidonganesa morwa ose kutameka noyirongwa kapisi nosiruwo. Varongwa kuyasika vana hulilire awo nkenye apa kuyasika povili zo 08h00, woma kutameka nosiruwo. Woma ou vana kara nawo kapisi wokuhuyunga tupu, Kompeli kuna kudiworoka ehudi eli kalihorokere sinkwa ntani opo ngandu karemekere munona.
‘’ Mo Ngonga, kuna karamu udigu pokatji koyikorama novantu. Yousili ose kuna kara momukaro gomudona sili unene. Yimo ana kugwedako. Eyi yina kara asi nampili vakurona nawo kuna kara nowoma eyi yina kuninkisa asi vahepa kukara momambo povili zo 19h00 nare vana kasika sika momambo gawo, morwa vana tjira yikasama eyi. Mokulimbururako nye kweyi yina kuvarugana yikasama eyi, Kompeli katuliremo ehundiro lyopangenderera koministeli zefiro simpa yimuna novadinguli omu navatura etokoro pangenderera. Nage kwapura asi, mokuturapo epopero lyokukwata siruwo vahepa kudikako evango lyokurara vana sure, omu navavapopera kusiponga sangesi yipo awo vagwane erongo.
Ose simpe twahepa kupapara silinga tugwedepo kweyi gagava nare Nampower yimaliwa yokusika ko N$2 million. Ose kuna kupandura kweyi garugana Nampower nye simpe tuna pumbwa yimaliwa yokusika ko N$1.5 million omu natudika nye evango lyokurara vana sure. Evango eli lyokurara kapi lina kara tupu asi evango, kuna kara nye lyokupopera eparu lyovana vetu, yimo ana kutanta Kompeli. Sure ezi kwakara novanona wokusika kupitaka 200. Age kagwedereko asi, varongwa ava wopoNgonga, erongo nekeverero kapi tayirumbasana kumwe. Nye dogoro ngano vana gwana yimaliwa vana pumbwa, apa ngesi awo kuna kara nye tupu neparu lyahuwe huwe morwa yikasama eyi vana kumona pomukunda.
-anakale@nepc.com.na